முல்லாவா? கொக்கா?

திடீரென்று முல்லாவிற்கு இசையில் ஆர்வம் ஏற்பட்டது! யாரிடமாவது முறையாக இசைப்பயிற்சி பெற வேண்டும் என எண்ணினார். அக்கம் பக்கம் விசாரித்துப் பார்த்ததில் அருகிலேயே ஒரு இசைக்கலைஞன் இருப்பதை அறிந்தார். அவரிடம் சென்று தனக்கு இசைப்பயிற்சி தரமுடியுமா? என்று கேட்டார் முல்லா.

 அதற்கு அந்த இசைக்கலைஞர் “”உங்களுக்கு பயிற்சி தர நான் தயார். ஆனால் ஒரு நிபந்தனை!”என்றார்.

 “”என்ன நிபந்தனை?”என்று முல்லா கேட்டார்.

 “”நீங்கள் எனக்கு தட்சணையாக முதல் மாதம் 10தங்கக் காசுகள் தர வேண்டும்…,இரண்டாவது மாதம், 5தங்கக் காசுகள்…,மூன்றாவது மாதம் 3 தங்கக் காசுகளும், நான்காவது மாதம்.., அதாவது பயிற்சி முடியும் கடைசி மாதத்தில் 1தங்கக் காசும் தரவேண்டும். சம்மதமா?”என்று கேட்டார் இசைக்கலைஞர்.

 உடனே முல்லா, “”சம்மதம்தான்…, நான் 4ஆவது மாதமே வந்து பயிற்சியில் சேர்ந்து கொள்கிறேன்” என்று கூறிவிட்டு வீட்டுக்கு நடையைக் கட்டினார். முல்லாவா? கொக்கா?

–பால.கோவிந்தராஜ்-சிறுவர் மணி