ஆரோக்கிய சமையல்

நுங்கு ஜுஸ்
தேவையானவை:
பனை நுங்கு – 5
பால் – கால் லிட்டர்
சர்க்கரை – 200 கிராம்
ரோஸ் எசன்ஸ் – 1 தேக்கரண்டி
செய்முறை: முதலில் நுங்கிலுள்ள மேல் தோலை நீக்கி மிக்ஸியில் அரைக்க வேண்டும். பாலை தண்ணீர் சேர்த்து காய்ச்சி ஆற வைத்து ரோஸ் எசன்ஸ் கலந்து மிக்ஸியில் அரைத்த நுங்கைக் கலந்து சர்க்கரை கலந்து பிரிஜ்ஜில் குளிர வைத்து எடுத்துச்
சாப்பிடலாம்.

நன்னாரி சர்பத்
தேவையானவை:
நன்னாரி வேர் – 200 கிராம்
தண்ணீர் – கால் லிட்டர்
சர்க்கரை – 200 கிராம்
செய்முறை: முதல் நாள் இரவே ஒரு பாத்திரத்தில் நீரை ஊற்றி நன்னாரி வேர்களைச் சிறு சிறு துண்டுகளாக்கி அதில் ஊற விட வேண்டும். மறுநாள் காலை வேருடன் ஊறிய நீரை அடுப்பில் வைத்து பாதியாக வற்றும்வரை காய்ச்சி வடிகட்டி நீரை மட்டும் எடுத்துக்கொள்ள வேண்டும். பிறகு சர்க்கரையை கம்பிப் பாகாக காய்ச்சி ஆற வைத்து ஆறியவுடன் நன்னாரி தண்ணீரைக் கலந்து எடுத்து வைத்துக்கொண்டு தண்ணீரில் கலந்து சாப்பிட கோடையின் தாகம் தணியும். உடல் சூடு குறையும். கண் எரிச்சல் வராது. நாக்கு வறட்சி உண்டாகாது. கோடைக்கு சுகம் தரும் சர்பத் இது.

தர்பீஸ் சர்பத்
தேவையானவை:
தர்பீஸ் பழம் – 1
சர்க்கரை – 300 கிராம்
எலுமிச்சை – அரை மூடி
இஞ்சி சாறு – 1 தேக்கரண்டி
செய்முறை: தர்பீஸ் பழத்தை தோல் சீவி விதை எடுத்து சிறு துண்டுகளாக்க வேண்டும். இதனுடன் சர்க்கரை, எலுமிச்சை சாறு, இஞ்சி சாறு சேர்த்து மிக்ஸியில் அடித்து பிரிஜ்ஜில் வைத்துக் குடிக்கலாம்.
-ஆர்.ஜெயலெட்சுமி, திருநெல்வேலி.
=

ஞாயிறு கொண்டாட்டம் – தினமணி