TNPSC GROUP II பொதுத் தமிழ் மாதிரி வினா-விடை

Advertisements

கன்ஃபூசியஸ் – சீன தத்துவ அறிஞருக்கு சிலை

கன்ஃபூசியஸ், சீன தத்துவ அறிஞர்.
கி.மு. 551- 479 காலத்தைச் சேர்ந்தவர்.

கன்ஃபூசியனிசம் என்று அவருடைய சிந்தனை முறை
அழைக்கப்படுகிறது. சமூகத்தின் எல்லாப் பிரிவு
மக்களும் சேர்ந்து படிக்கக் கூடிய பள்ளிக்கூடத்தை
அந்தக் காலத்திலேயே நிறுவியவர்.

அவருக்கு சமீபத்தில் கிழக்கு சீனப் பகுதியில் உள்ள
ஷான்டாங்க் மாகாணத்தில் ஒரு சிலை நிறுவப்பட்டுள்ளது.
உலகிலேயே உயரமான சிலை அது.

72 மீட்டர் உயரம். இந்தச் சிலையை அமைக்கும் வேலைகள்
2013-இல் தொடங்கப்பட்டுவிட்டன. இதன் அடிப்பகுதியின்
அகலம் 7,800 சதுர மீட்டர்.

சீனாவின் பாரம்பரிய கலாசாரத்தை எடுத்துக்காட்டவே
இந்தச் சிலையை அமைத்திருக்கிறார்கள்.

——————————

– என்.ஜே., சென்னை-116.
தினமணி கதிர்

காந்தி நடத்திய தமிழ்ப் பத்திரிகை!

kadhir5
காந்தியடிகள் தென்னாப்பிரிக்காவில் இருந்தபோது
தமிழ்ப் பத்திரிகை நடத்தினார்.

அதன் பெயர் “இந்தியன் ஒப்பீனியன்’ நான்கு பக்கங்கள்
கொண்ட இந்த பத்திரிகையில் ஒரு பக்கம் ஆங்கிலத்திலும்,
ஒரு பக்கம் இந்தியிலும், ஒரு பக்கம் குஜராத்தியிலும்,
ஒரு பக்கம் தமிழிலும் செய்திகள் வந்தன.

——————-
தினமணி

மின்னல்… தப்பிப்பது எப்படி

மின்னல் நொடிக்கு 50 முதல் 100 முறை பூமியை தாக்குகிறது.
அப்போது 30,000 டிகிரி செல்சியஸ் வெப்பம் ஏற்படுகிறது.
உயிரினங்கள், தொலைத்தொடர்பு, மின்னனு சாதனங்களுக்கு
பெரும் சேதம் ஏற்படுத்துகிறது.

மின்னல் ஆபத்து இடங்கள் :

* களத்து மேடு, உயர்ந்த இடங்கள், குடிசை.
* பாதுகாப்பற்ற மின்சார கம்பி வடங்கள், உலோக கட்டமைப்புகள்.
* கோல்ப் மைதானம், பரந்த நிலப்பரப்பு.
* மலை முகடுகள்
* விமானங்கள்.

மின்னலின் போது செய்யக்கூடாதவை :

* மின்சாரத்தால் இயங்கும் ரேசர், ஹேர் டிரையர் போன்றவற்றை
பயன்படுத்தக் கூடாது.
* அலைபேசி, தொலைபேசியை பயன்படுத்தக்கூடாது.
* உலோகப் பொருட்களை வெட்ட வெளியில் பயன்படுத்த
வேண்டாம்.
* இரும்பு கம்பியுடன் கூடிய குடையை தவிர்க்க வேண்டும்.

மின்னலில் இருந்து பாதுகாத்துக் கொள்ள :

* மக்கள் வெளிப்பகுதிகளில் இருக்கும் போது கட்டிடங்கள்,
குகை அல்லது பள்ளமான பகுதிகளை தேர்வு செய்து ஒதுங்க
வேண்டும். உயர்ந்த மரங்களை மின்னல் எளிதாக தாக்கும்
என்பதால் அருகே செல்லக் கூடாது.

* வெட்டவெளியில் தனித்த மரங்கள் மட்டும் உள்ள பகுதி
எனில், கைகளால் கால்களை இறுக அணைத்து கால்கள்
ஒன்றோடு ஒன்று ஒட்டிக் கொள்ளாமல் குனிந்த நிலையில்
தரையில் அமர்ந்து கொள்ள வேண்டும்.

குதி கால்களை உயர்த்தி முன்னங்கால்கள் குறைவான
இடத்தில் படும் படி அமர வேண்டும்.

* நம் கைகளால் காதுகளை மூடிக் கொள்வதால்,
மின்னலால் ஏற்படும் அதீத சப்தத்தில் விடுபடலாம்.

* மின்சாரம் கடத்தும் பொருட்கள், நெருப்பு உள்ள இடங்களில்
இருந்து தள்ளி இருக்க வேண்டும்.

* இரு சக்கர வாகனங்களில் இருந்து தள்ளி நிற்க வேண்டும்.
இரும்பு கைப்பிடி சுவர்களை தொடுவதை தவிர்க்க வேண்டும்.

* பாலங்களுக்கு கீழ் தஞ்சம் அடையலாம்.

* உயர் அழுத்த மின் தடங்களை தாங்கி நிற்கும்
கோபுரங்களுக்கு அருகில் செல்வதை தவிர்க்க வேண்டும்.
குறைந்தது 50 அடி துாரத்தில் இருப்பது நல்லது.

* தாழ்வான பகுதிகளில் அடர்த்தியாக வளர்ந்துள்ள
குட்டை மரங்களுக்கு கீழ் தஞ்சம் அடையலாம்.

—————————-
நன்றி- தினமலர்

சீனா விவசாயிகள் அசத்தல்… கார்ட்டூன் கதாபாத்திர வடிவத்தை போல் பயிரிடப்பட்ட பயிர்கள்

ஹூபே:
தொழில் நுட்பம், சாலை வசதி என பல துறைகளிலும்
பிரம்மாண்டத்தை காட்டும் சீனா, பயிர் தொழிலிலும்
பிரம்மாண்டத்தை காட்டி இருக்கிறது.

வடக்கு சீனாவில் உள்ள ஹூபே மாகாணத்தில் பல்வேறு
வண்ணங்களில் சீன கேலி சித்திர கதாபாத்திரங்கள்,
வடிவியல் அமைப்புகள் என வினோதமாக பயிர்கள்
நடப்பட்டுள்ளன.

கழுகுப் பார்வையில் இவற்றை பார்க்கும் போது
மெய்சிலிர்க்க வைக்கிறது. கடந்த மே மாதம்
விவசாயிகள் கவனமாக கணக்கீடு செய்த பிறகு
விதைகளை விதைத்தனர்.

இப்போது அவர்களின் கலைப்படைப்பு பழுத்த நெல்
வயலில் பறந்து விரிந்து காணப்படுகிறது.
இக்காட்சிகள் இணையத்தில் அதிகம் பேரால்
பகிரப்பட்டுவருகிறது.

இதுபோல வினோதமாக பயிர்களை நடுவதால், இதனை
காண்பதர்க்கு சுற்றுலா பயணிகள் வருகின்றனர்.
இது உலகின் சிறிய மூலையில் உள்ள தங்கள்
கிராமங்களுக்கு சுற்றுலா பயணிகளை கொண்டு
வருவதற்கான வழி என விவசாயிகள் மகிழ்ச்சியுடன்
தெரிவிகின்றனர்.

——————————
தினகரன்

இறந்த பிறகும் உலகை பார்க்கலாம்

DKN_Tamil_Daily_News_Sep25_2018__9127008318902.jpg

இந்தியாவில் ஒவ்வொரு ஆண்டும் ஆக.25 முதல் செப்.8ம்
தேதி வரை தேசிய கண்தான இருவார விழா கொண்டாடப்
படுகிறது.

பார்வையின்மையை கட்டுப்படுத்தும் விதமாக இது
அனுசரிக்கப்பட்டு வருகிறது. கண்பார்வை இழப்பு
இந்தியாவில் அதிகம். சுமார் ஒன்றரை கோடி பேர்
பார்வைக்குறைபாட்டினால் பாதிக்கப்பட்டுள்ளனர்.

இதில் 60 சதவீதம் பேர் 12 வயதிற்கு உட்பட்டவர்கள்
என்பதுதான் வேதனை. 40 லட்சத்திற்கும்மேல் கார்னியா
குறைபாட்டினால் பாதிக்கப்பட்டு கருவிழிக்காக
‘காத்து கொண்டுள்ளனர்’.

ஆனால் கிடைக்கும் கருவிழிகளோ ஆண்டிற்கு 19 ஆயிரம்
மட்டும்தான். இதனால் ‘உலகை பார்க்கும் வாய்ப்பு இருந்தும்’
லட்சக்கணக்கானோர் தொடர்ந்து இருளிலே பரிதவித்து
வருகின்றனர்.

பற்றாக்குறை இருப்பதால்தான் ஒரு கண்ணிற்காவது
பார்வை கிடைக்கட்டுமே என்ற நோக்கில் ஒருவருக்கு ஒரு
கருவிழி வீதம் பொருத்தப்பட்டு வருகிறது. கார்னியா
பாதித்தால் ஏன் பார்வை தெரியவதில்லை? ஏனென்றால்
கார்னியா எனப்படும் விழிவெண்படலம் பாதிக்கப்பட்டால்
ஒளிக்கதிர்கள் உள்ளே செல்வது தடுக்கப்பட்டுவிடும்.

இதனால் விழித்திரையில் பிம்பம் படியாமல் பார்வை
குறைபாடு ஏற்படுகிறது. தொற்றுநோய்கிருமிகள், விபத்து,
ஊட்டச்சத்து குறைவு, கண்சிகிச்சை குறைபாடு மற்றும்
பிறவியிலேயே இப்பிரச்னை ஏற்படலாம்.

கண்தானத்தை பொறுத்தளவில் ஒருவயது நிரம்பிய
குழந்தை முதல் எந்தவயதினரும் செய்யலாம். கண்ணாடி
அணிந்தவர்களும் கண்ணில் கண்புரை நீக்க அறுவைச்
சிகிச்சை (காட்ராக்ட்) செய்தவர்களும்கூட தானம்
அளிக்கலாம்.

எய்ட்ஸ், மஞ்சள்காமாலை, வெறிநாய்க்கடி, பாம்புக்கடி,
புற்றுநோய், மூளைக்கட்டி போன்றவற்றால்
இறந்தவர்களின் கண்கள் தானமாக பெற முடியாது.

இறந்தவர்களின் கண்களை அப்படியே எடுத்து
மற்றவர்களுக்கு பொருத்தப்படுகிறது என்று பலரும்
தவறாக நினைக்கிறார்கள். இது உண்மையல்ல.

கண்ணில் உள்ள கார்னியா எனும் கருவிழியை மட்டுமே
எடுத்து பார்வையிழந்தவர்களுக்கு பொருத்தப்படுகிறது.
கண்தானம் பெற்றபிறகு இமைகளை மூடி தைத்து
விடுவதால் முகம் விகாரமாக தோன்றாது.

பதிவுசெய்யாதவர்களிடம் இருந்து கூட கண்கள் தானமாகப்
பெறப்படுகிறது. இதற்கு இறந்தவரின் மகன், மகள்
ஆகியோரின் ஒப்புதல் இருந்தால் போதுமானது.

இறந்து சுமார் 6 மணிநேரத்திற்குள் இவற்றை பெற்று
48 மணிநேரத்திற்குள் மற்றவர்களுக்குப் பொருத்திவிட
வேண்டும்.

மருத்துவர்குழு வரும்வரை கண்களில் சுத்தமான தண்ணீர்
விட்டு இமைகளை மூடிவைக்க வேண்டும். அல்லது
சுத்தமான ஈரத்துணியை போட்டு வைக்கலாம்.

இது கார்னியா குளிர்ச்சியாக இருக்க உதவும். தலையணை
வைத்து இறந்தவர்களின் தலையை உயர்த்தி வைக்க
வேண்டும். மின்விசிறியை அணைத்து வைக்க வேண்டும்.
15 முதல் 20 நிமிடத்திற்குள் கண்கள் தானமாக எடுத்து
கொள்ளப்படும். தானம் அளிக்க விரும்பும் உறவினர்கள்
அருகில் உள்ள அரசுமருத்துவமனை, கண்வங்கிகளுக்குத்
தொடர்பு கொண்டு தெரிவித்தால் போதும்.

மக்கள்தொகையின் அடிப்படையில் இந்தியாவைவிட
இலங்கை பல மடங்கு குறைவு. ஆனால் இந்தியாவிற்கு
தேவையான கண்கள் அதிகம் இலங்கையில் இருந்தே
பெறப்படுகிறது. காரணம், இலங்கையில் கண்தானம்
கட்டாயமாக்கப்பட்டிருப்பதுதான்.

நம்நாட்டிலும் இதுபோன்ற விழிப்புணர்வை ஏற்படுத்த
வேண்டும்.

——————————
தினகரன்

முடி வளர்ச்சிக்கு உதவும் வேப்ப எண்ணெய்

oil.jpg

குளிர்ச்சியினால் வரும் தலைவலி, பிடரிவலிக்கு வாரம்
ஒருமுறை வேப்ப எண்ணெய்யை தலையில் தேய்த்து
நன்றாக ஊறிய பின் தலைக்கு குளித்து வந்தால்
குணமாகும்.

அன்றைய தினம் பகலில் தூங்கக்கூடாது. தினமும்
வேப்ப எண்ணெய்யை தலைக்கு தடவி வந்தால் பேன்
தொல்லை ஒழியும். முடிகொட்டுவது நிற்பதுடன்,
முடியும் நன்றாக செழித்து வளரும்.

மூக்கடைப்பு ஏற்பட்டால் இரவில் தூங்குவது கஷ்டமாக
இருக்கும். எனவே படுக்க செல்லும் முன் மூக்கின்
துவாரத்தில் தடவினால் மூக்கடைப்பு சரியாகும்.

வாதநோய் தாக்குதலால் கை, கால்கள் உணர்விழந்து
விடும். அதற்கு வேப்ப எண்ணெய்யில் வதக்கிய
ஆமணக்கு இலையினை எடுத்து பாதிக்கப்பட்ட
பகுதிகளில் வைத்து கட்ட மெல்ல மெல்ல குணமாகும்.

தினமும் சிறிது வேப்ப எண்ணெய்யை சாப்பிட்டால்
நீரிழிவு எனும் சர்க்கரை நோய் கட்டுப்படுவதாக
நம்பப்படுகிறது.

குளிர்காலத்தில் கைகால் சில்லிட்டு விட்டால் 50மிலி
வேப்ப எண்ணெய்யை சூடாக்கி அதில்
கட்டிக்கற்பூரத்தை பொடித்து போட்டால் கற்பூரம்
கரைந்து விடும். இந்த எண்ணெய்யை உள்ளங்கையிலும்,
உள்ளங்காலிலும் நன்றாக சூடு பறக்க தேய்த்தால்
கை, கால் சில்லிட்ட நிலை மாறி விடும்.

——————————
நன்றி-தினகரன்

கழுதையும் சகிப்புத்தன்மையும்

கழுதைகள் வெகுவாய் அருகிவிட்டன. இது பாலூட்டி
இனத்தை சேர்ந்த தாவர உண்ணி விலங்காகும்.

சலவைத் தொழிலாளிகளுக்கு பொதி சுமக்கும் பணியை
செய்து வந்தது. காலமாற்றத்தால் இதன் தேவை வெகுவாய்
குறைந்துவிட்டது.

தற்போது மலைக்கிராமங்களில் பாரம் சுமக்க பயன்
படுத்தப்பட்டு வருகிறது. குதிரை, வரிக்குதிரையை போல
ஒற்றைப்படை குளம்பிகள் வரிசையை சேர்ந்த ஒரு
விலங்கு ஆகும்.

மூக்கின் அருகே வெண்மையாக இருப்பது இதன்
அடையாளங்களில் ஒன்றாகும்.

கழுதை சகிப்புத்தன்மைக்கு பெயர் பெற்றது.
இதற்கு தாக்குப்பிடிக்கும் திறன் அதிகம். இதனால்
கரடுமுரடான பகுதிகளில் மிகுந்த பாரம் தூக்கிச் செல்ல
பயன்படுத்தப்படுகின்றன.

பெரும்பாலும் காட்டுக்கழுதைகள் 102 முதல் 142 செமீ.
வரையும், வீடுகளில் வளர்க்கப்படும் கழுதைகள்
91 முதல் 142 செமீ.வரையும் வளர்கின்றன. மிதமான
பாலைநிலங்களிலும் இவை வாழும் திறன் கொண்டது.

குதிரையை விட குறைவான உணவே உண்ணும்.
அதிகமான உணவு கொடுக்கப்படும் கழுதைகள்
‘லேமினிடிஸ்’ என்ற நோயினால் பாதிக்கப்படும்.

கழுதைகளால் அதிக சப்தத்தில் ஒலி எழுப்ப முடியும்.
இதன் கனைப்பு மற்ற விலங்குளின் ஒலி எழுப்புவதை
விட வித்தியாசமாகவும், நகைப்பாகவும் இருக்கும்.

பெரியளவில் பயன்பாடின்றி உள்ள இந்த கழுதையை
இழிவாக பார்க்கும் நிலையே உள்ளது.
கழுதைக்கு தெரியுமா கற்பூர வாசனை என்று
சொல்வதும், தவறு செய்பவர்களை கரும்புள்ளி,
செம்புள்ளி குத்தி கழுதையில் ஏற்றி அவமானப்
படுத்துவது, மோசமான பாடலின் போது கழுதை
கனைப்பது என்று இழிநோக்கிலே இந்த இனம்
சித்திகரிக்கப்படுகிறது.

அருகி வரும் உயிரினங்கள் மிருகக்காட்சி சாலையில்
வைத்து பாதுகாக்கப்படுவது வழக்கம். ஆனால் பாவம்
கழுதைக்கு அந்த வாய்ப்பும் இல்லை.

வரும் தலைமுறையினர் இனி புகைப்படங்களில்தான்
கழுதையை பார்க்க முடியும் போலிருக்கிறது.

———————————
தினகரன்

தாமிரபரணி நதியில் மகா புஷ்கரம் விழா

நதிகள், நம் வாழ்வின் அங்கம்.
நதிகளைப் பாதுகாக்கவும், அவற்றை புனிதமாகக்
கருதி போற்றவும், பல விழாக்களை ஏற்படுத்தினர்,
நம் முன்னோர்.

ஆடிப்பெருக்கு, கும்பகோணம் மகா மகம், மற்றும்
தை மாதம் ஏதாவது ஒரு ஞாயிறன்று, வீட்டில்
பொங்கல் வைத்து, நதிகளில் தீபம் மிதக்க விடுதல்
ஆகியவை அவ்விழாக்கள்.

வடமாநிலங்களில், ‘புஷ்கரம்’ என்ற பெயரில் விழா
எடுப்பர். ‘புஷ்கரம்’ என்றால் புனித தீர்த்த கலசம்
என்று அர்த்தம்.

உலகிலுள்ள அத்தனை நதிகளின் நீரிலும், பாற்கடலில்
கடைந்தெடுத்த சாகா மருந்தான, அமிர்தமும்
கலந்துள்ளது.

புஷ்கரம் விழாவைக் கொண்டாடுவதற்கு
ஒரு புராணக்கதை உண்டு…

புனித தீர்த்த கலசத்தைப் படைப்புக் கடவுளான பிரம்மா
வைத்திருந்தார். இந்த கலசம் தனக்கு வேண்டுமென,
நவக்கிரகங்களில் ஒருவரான குரு பகவான், பிரம்மனை
நினைத்து தவமிருந்தார்.

தவத்தை ஏற்ற பிரம்மா, குருவுக்கு அதைக் கொடுக்க
முன்வந்தார்.

அப்போது, அந்த கலசம், பிரம்மாவிடம்,
‘சுவாமி… நான் தங்களை விட்டு பிரிய மாட்டேன்.
உங்களோடு தான் இருப்பேன்…’ என, அடம் பிடித்தது.

எனவே, குருவிடம், ‘என்னை விட்டு பிரிய மனமில்லாத,
இந்த கலசத்தின் வேண்டுகோளையும் ஏற்க வேண்டியுள்ளது…

‘ஒரு ராசியை விட்டு இன்னொரு ராசிக்கு தாங்கள்
கடக்கும் காலத்தில் (குரு பெயர்ச்சியன்று) முக்கியமான
புண்ணிய நதிகளுக்கு இதை எடுத்துச் சென்று,
இதிலுள்ள நீரை அந்த நதிகளில் கலந்தால், அதில்
நீராடும் அத்தனை பேரின் பாவமும் நீங்கப் பெறும்;
ஆயுளும் அதிகரிக்கும்…’ என்றார், பிரம்மா.

இன்று வரை குருவும், அவ்வாறே செய்கிறார்.
ஒரு ராசியில் ஓராண்டு இருப்பார், குரு.
தற்போது, அவர் விருச்சிக ராசிக்கு வருகிறார்.
மீண்டும் இதே ராசிக்கு வர, 12 ஆண்டு ஆகும்.

இப்படியே, 12 முறை பெயர்ச்சியாகி வருவதற்கு,
144 ஆண்டுகள் ஆகும். இவ்வாறு, 144 ஆண்டுகளுக்கு
ஒருமுறை வரும் நாளே, மகா புஷ்கரம்.

இந்த விழாவிற்குரிய எண், 12 என்பதன் அடிப்படையில்,
12 நாட்கள் விழா கொண்டாடப்படுகிறது.

இம்முறை, திருநெல்வேலி மற்றும் துாத்துக்குடி
மாவட்டங்களில் பாயும் தாமிரபரணி நதியில்
இந்த விழா நடக்கிறது.

குரு பெயர்ச்சி, வரும் அக்டோபர், 11ம் தேதி நிகழ்வதால்,
அன்று துவங்கி, 22ம் தேதி வரை, தாமிரபரணியில்
புனித நீராடினால், குரு பகவானின் அனுக்கிரகம்
பெறலாம்.

கடந்த முறை, காவிரியில் மக்கள் நீராடிய போது,
தங்கள் ஆடைகளை களைந்து, நதியில் விட்டனர்.

இப்படி செய்தால் தான் பாவம் தீரும் என சில
ஜோதிடர்கள் தவறான வழிகாட்டுதலைத் தருவதால்
இவ்வாறு செய்கின்றனர். இதனால், நதி பாழாகிறது.

தாமிரபரணி நதியில், தோஷம் கழிப்பதாகச் சொல்லி,
இதே வேலை நடந்து வருகிறது. சமீபத்தில்,
100 டன் ஆடைகளை நதியில் இருந்து அகற்றினர்.

மேலும், ஆலைக்கழிவு, சோப்பு, ஷாம்பு நுரை,
பிளாஸ்டிக் பைகளை மிதக்க விடுதல், மாமிச
கழிவுகளை எறிதல் மற்றும் மது பாட்டில்களை
உடைத்துப் போடுதல் என, நதியே பாழாகிறது.

குறிப்பாக, தாமிரபரணியின் உற்பத்தி ஸ்தானமான
பாபநாசத்தில் இந்த செய்கைகள் மிக அதிகமாக
உள்ளது.

நதிகளைப் பாதுகாக்கவே விழாக்கள் வருகின்றன.
நாம் நீராடவும், குடிக்கும் நதி நீரைப் பாதுகாக்க
வேண்டும் என்ற உணர்வுடன், மகா புஷ்கரத்துக்கு
வந்தால் தான், தாமிரபரணி தாயின் அருளைப் பெற
முடியும்.

—————————-

தி.செல்லப்பா
வாரமலர்

பிரமாண்ட ஆல மரம்!

மேற்கு வங்க மாநிலம், கோல்கட்டாவில் உள்ள
ஆச்சார்யா ஜெகதீஷ் சந்திரபோஸ் தாவரவியல்
பூங்காவுக்கு செல்வோர், ஆச்சரியத்துடனேயே
திரும்புவது வழக்கம்.

அங்கு அமைந்துள்ள பிரமாண்ட ஆல மரம் தான்,
இதற்கு காரணம். பிரமாண்டம் என்றால், சாதாரண
பிரமாண்டம் அல்ல;
இரண்டு ஏக்கர் பரப்பளவில் அமைந்துள்ளது,
இந்த ஆல மரம்.

இந்த மரத்தை, துாரத்தில் இருந்து பார்த்தால்,
ஆயிரக்கணக்கான விழுதுகள், கிளைகளுடன்,
ஒரு சிறிய காடு போலவே தோன்றும்.

போதிய ஆவணங்கள் இல்லாததால், இந்த ஆல மரத்தின்
துல்லியமான வயதை கண்டுபிடிக்க முடியவில்லை.

ஆனாலும், 250 ஆண்டுகள் பழமையானதாக இருக்கலாம்
என, மதிப்பிட்டுள்ளனர் தாவரவியல் பூங்கா
நிர்வாகத்தினர். இதுவரை, இந்த பகுதியில் வீசிய இரண்டு
புயல்களுக்கு தாக்குப்பிடித்து நிற்கும் இந்த பிரமாண்ட
ஆல மரம், ஒரு ஆச்சரிய அதிசயம் தான்.

கோல்கட்டாவுக்கு சென்றால், தவறாமல்,
இந்த அதிசயத்தை தரிசித்து வாருங்கள்.

—————————————
– ஜோல்னாபையன்.

 

« Older entries