தேதி சொல்லும் சேதி

Advertisements

அப்படீங்களா!

யோசிக்கிறாங்கப்பா!
—————

பணம் சம்பாதிப்பது
குண்டூசியால்
பள்ளம் தோண்டுவது போல…
ஆனால் செலழிப்பதோ
குண்டூசியால்
பலூனை உடைப்பது போல.

ஜெ.சசிகலா, ஆனைக்காரன் சத்திரம்.

——————————-

அப்படீங்களா!
—————

இந்தியாவில் ஓட்டுநர் உரிமம் பெற்றவர்கள்
அந்த ஓட்டுநர் உரிமத்தை வைத்து வெளிநாடுகளில்
கார் ஓட்ட முடியுமா?

சில நாடுகளில் ஓட்ட முடியும். ஒவ்வொரு நாட்டிலும் கார்
ஓட்ட அனுமதிக்கப்படும் கால அளவு வேறுபடும்.

நார்வே, ஆஸ்திரேலியா ஆகிய நாடுகளில் மூன்று மாதத்துக்கு
கார் ஓட்டலாம். ஜெர்மனியில் ஆறு மாதங்களும்,
மொரிஷியஸில் நான்கு வாரங்களும், தென்னாப்பிரிக்கா,
கிரேட் பிரிட்டன், ஸ்விட்சர்லாந்து, நியூஸிலாந்து, பிரான்ஸ்,
அமெரிக்கா ஆகிய நாடுகளில் ஓராண்டு வரை இந்திய
ஓட்டுநர் உரிமம் செல்லுபடியாகும்.

ஓட்டுநர் உரிமம் ஆங்கிலத்தில் இருந்தால்தான் ஏற்றுக்
கொள்வார்கள். சிலநாடுகளில் ஆங்கிலத்தோடு அந்நாட்டு
மொழியில் ஓட்டுநர் உரிமத்தை மொழி பெயர்த்துக் காட்ட
வேண்டும்.

பிரான்சில் பிரெஞ்ச் மொழியிலும், ஜெர்மனியில் ஜெர்மன்
மொழியிலும் ஓட்டுநர் உரிமம் மொழிபெயர்க்கப்பட்டு
இருக்க வேண்டும்.

போக்குவரத்துக் காவல்துறையினர் கேட்கும்போது,
“ஓட்டுநர் உரிமத்தை மறந்துவிட்டேன்’ என்று தலையைச்
சொறியக் கூடாது. சிக்னல்களையெல்லாம் மதிக்காமல்
ஓவர் ஸ்பீடில் “கன்னாபின்னா’வென்று ஓட்டக் கூடாது.

——————————
என்.ஜே., சென்னை-116.
தினமணி கதிர்

திரையிசைப் பாடல்களில் இலக்கணம்:

 

திரையுலகம் அனைத்துத் தரப்பு மக்களையும் சென்றடையக் கூடியது. அதன் மூலம் நாம் ஒரு செய்தியைக் கூறினால், உடனே புரிந்து கொள்ளும் தன்மை, யாருக்கும் உண்டு. இதில் வரும் இலக்கணங்கள் இனிப்புத் தடவப்பட்ட “கசப்பு மாத்திரைகள்” என்று கூறலாம்.

🖌தமிழ் இலக்கணம் குறித்த சில சான்றுகள் இங்கே உங்களுக்காக…

🖌அடுக்குத்தொடர்:
ஓடிஓடி உழைக்கனும் ஊருக்கெல்லாம் கொடுக்கனும்.

🖌இரட்டைக்கிளவி:
ஜல்ஜல் எனும் சலங்கை ஒலி சலசல எனச் சாலையிலே.

🖌சினைப்பெயர்:
பூப்பூவா பறந்து போகும் பட்டுப்பூச்சி அக்கா.

🖌பொருட்பெயர்:
கண்ணன் என்னும் மன்னன் பெயரைச் சொல்லச் சொல்ல

🖌இடப்பெயர்:
வீடு வரை உறவு வீதி வரை மனைவி!

🖌காலப்பெயர்:
வெள்ளிக்கிழமை விடியும் வேளை வாசலில் கோலமிட்டேன்!

🖌குணம் அல்லது பண்புப்பெயர்:
அச்சம் என்பது மடமையடா அஞ்சாமை திராவிடர் உடமையடா!

🖌தொழில் பெயர்:
ஆடலுடன் பாடலைக் கேட்டு ரசிப்பதிலே தான் சுகம்! சுகம்!

🖌இறந்த காலப் பெயரெச்சம்:
வந்த நாள் முதல் இந்த நாள் வரை வானம் மாறவில்லை!

🖌எதிர்காலப் பெயரெச்சம்:
ஓடும் மேகங்களே ஒரு சொல் கேளீரோ?

🖌இடவாகுபெயர்:
உலகம் ஆயிரம் சொல்லட்டுமே உனக்கு நீ தான் நீதிபதி

🖌எதிர்மறைப் பெயரெச்சம்:
துள்ளாத மனமும் துள்ளும் சொல்லாத கதைகள் சொல்லும்

🖌குறிப்புப் பெயரெச்சம்:
அழகிய தமிழ்மகள் இவள் இரு விழிகளில் எழுதிய மடல்!

🖌ஈறுகெட்ட எதிர்மறைப் பெயரெச்சம்:
வாசமில்லா மலரிது வசந்தத்தைத் தேடுது.

🖌வன்றொடர்க் குற்றியலுகரம்:
முத்துப்பல் சிரிப்பென்னவோ முல்லைப்பூ விரிப்பென்னவோ!

🖌நெடிற்றொடர்க் குற்றியலுகரம்:
நாடு அதைநாடு அதை நாடாவிட்டால் ஏது வீடு

🖌உயிர்த்தொடர்க் குற்றியலுகரம்:
ஞாயிறு ஒளி மழையில் திங்கள் குளிக்க வந்தாள்

🖌இரண்டாம் வேற்றுமை உருபு:
நிலவைப்பார்த்து வானம் சொன்னது என்னைத் தொடாதே.

🖌மூன்றாம் வேற்றுமை உருபு:
உன்னால் முடியும் தம்பி! தம்பி!!

🖌 பெயர்ப் பயனிலை:
காலங்களில் அவள் வசந்தம் கலைகளிலே அவள் ஓவியம்….

————————————–

ஆசிரியர்களுக்குப் பயன்படும் பகிர்வு

நன்றி
சமண இயக்கம்

இதுவும்கடந்துபோகும்

 

நம்முடைய இதுநாள் வரை வாழ்க்கையையும் திரும்பிப் பார்த்தால் இந்த வாக்கியத்தின் மகத்தான உண்மையை உணர முடியும்.

எத்தனை வெற்றிகள் ,
எத்தனை தோல்விகள் ,
எத்தனை மகிழ்ச்சிகள் ,
எத்தனை துக்கங்கள் …

எல்லாம் வந்து சிறிது காலம் தங்கி கடந்து போயிருக்கின்றன.

வந்ததெல்லாம் நம்மை விட்டுப் போவதால் நம்முடையதல்ல என்பது உறுதியாகிறதல்லவா?

வந்து போவதெல்லாம் நம்முடையதல்ல என்பதால் நாம் வெறும் பார்வையாளர்களே அல்லவா?

எத்தனை நண்பர்கள் ,
எத்தனை பகைவர்கள் ,
எத்தனை உறவுகள் நம் வாழ்வில் முக்கிய அங்கம் வகித்து வெறும் நினைவுகளை மட்டும் நம்மிடம் விட்டு விட்டுப் போயிருக்கிறார்கள்?

வாழ்வில் வந்ததெல்லாம் நம்மைக் கடந்து சென்று கொண்டு தானே இருக்கின்றன.
ஒரு விதத்தில் என்றும் நாம் தனியர்களே அல்லவா?

இயற்கையின் விதியே இது என்று உளமார உணர்ந்து தெளியும் போது கிடைக்கும் அமைதி சாதாரணமானது அல்ல.
அந்த அமைதியை மனதில் நிரந்தரமாக்கிக் கொள்ளுங்கள்.

*வெற்றிகள் கிடைக்கும் போது.,

“#இதுவும்கடந்துபோகும்” என்பதை நினைவில் கொள்ளுங்கள்…கர்வம் தலை தூக்காது.

*தோல்விகள் தழுவும் போது..,

“#இதுவும்கடந்துபோகும்” என்பதை நினைவில் கொள்ளுங்கள்…சோர்ந்து விட மாட்டீர்கள்.

*நல்ல மனிதர்களும், நண்பர்களும் உங்கள் வாழ்க்கையில் வரும் போது.,

“#இதுவும்கடந்துபோகும்” என்பதை நினைவில் கொள்ளுங்கள். இருக்கும் போது – அவர்களை கௌரவிப்பீர்கள்.அவர்கள் விலகும் போது பெரிதாக பாதிக்கப்படாமல் இருப்பீர்கள்.

*தீய மனிதர்களும், பகைவர்களும் உங்கள் வாழ்வில் வரும் போது..,

“#இதுவும்கடந்துபோகும்” என்பதை நினைவில் கொள்ளுங்கள். – தானாகப் பொறுமை வரக் காண்பீர்கள். பெரிதாக மனஅமைதியை இழக்க மாட்டீர்கள்.

*நெற்றி சுருங்கும் போதெல்லாம்..,

“#இதுவும்கடந்துபோகும்” என்பதை நினைவில் கொள்ளுங்கள்.- சுருக்கம் போய் முகத்தில் புன்னகை தவழக் காண்பீர்கள்.

வாழ்க்கையின் ஜீவநாதமாக இந்த உண்மை உங்கள் இதய ஆழத்தில் பதிந்து போய் விட்டால்.,

அந்தப் புன்னகை நிரந்தரமாக உங்கள் முகத்தில் தங்கி விடுவதை மற்றவர்கள் காண்பார்கள்…🙏🏻

.வாட்ஸ் அப் பகிர்வு

 

அக்னிக்கு அஸ்திவாரம்

IMG_1707.jpg

விலங்குகளுக்கு மனம் உண்டா?

 

 

IMG_1708.jpgIMG_1709.jpg

திருக்குறள் பரப்பும் காகித பென்சில்!

பென்சிலைக் கொண்டு காகிதங்களில் எழுதலாம்.
காகிதங்களைக் கொண்டு பென்சிலைத் தயாரிக்க முடியுமா?

‘முடியும்’ என்று கட்டை விரலை உயர்த்திக் காட்டுகிறார்
சித்தார்த்தன். பென்சிலுக்காக ஆயிரக்கணக்கான மரங்கள்
வெட்டப்படுவதைத் தடுக்கிறது இவரது முயற்சி. தவிர,
இப்பென்சில் ஒவ்வொன்றும், ஒரு திருக்குறளைத் தாங்கி
வந்து குழந்தைகளைக் குதூகலிக்கச் செய்கிறது.

இந்த ‘திருக்குறள் பென்சிலு’க்கு அமெரிக்கா, மலேசியா,
சிங்கப்பூர் போன்ற நாடுகளில் தனி மவுசு.‘‘திருக்குறள்
பென்சிலுக்கு அப்பா தான் முழு முதற்காரணம்…’’ என்று
நெகிழ்வாக ஆரம்பித்தார் சித்தார்த்தன்‘‘சொந்த ஊர்
திருநெல்வேலி. அப்பா இசை இறை சேரலாதன்.

திருக்குறள்னா அவருக்கு உயிர். திருக்குறள் பற்றி ஏராளமான
கட்டுரைகளை எழுதியிருக்கார். அதில் பல கட்டுரைகள் தமிழின்
பிரபலமான பத்திரிகைகளில் பிரசுரமாகியிருக்கு.

அரசு வேலையில அப்பா இருந்ததாலே ஊர் ஊரா மாறிகிட்டே
இருப்போம். கடைசியில மதுரையில செட்டில் ஆகிட்டோம்.
எனக்கு அக்காவும், அண்ணனும் இருக்காங்க. சின்ன வயசுல
காலையில எழுந்தவுடன் நாங்க மூவரும் அப்பாகிட்ட பத்து
திருக்குறளை மனப்பாடமா சொல்லணும்.

அப்படிச் சொன்னாதான் எங்களுக்கு தேன் கலந்த சர்பத்
கிடைக்கும். டீ, காபி எல்லாம் எங்க வீட்டுல கிடையாது.
எல்லாமே தமிழ் மரபுப்படி தான். ஸ்கூலுக்குப் போகும்போதே
1330 குறளும் எங்களுக்கு அத்துப்படி.

திருக்குறளைச் சொல்லாம, படிக்காம ஒரு நாளும் கழிந்ததே
இல்லை.

திருக்குறளை மந்திரமா சொல்லித்தான் எனக்கு கல்யாணமே
நடந்ததுனா பாத்துக்குங்க…’’ என திருக்குறளுக்கும் தனது
குடும்பத்துக்கும் உள்ள நெருங்கிய பந்தத்தை விவரித்த
சித்தார்த்தன் தொடர்ந்தார்.

———————————————–

‘‘படிப்பு முடிஞ்சதும் ரியல் எஸ்டேட் பிசினஸ் பண்ணிட்டே
‘குறள் நெறி’னு ஒரு பதிப்பகம் தொடங்கி பாடப்
புத்தகங்களை வெளியிட்டு வந்தேன். இடையில அப்பா
இறந்துட்டார். பிசினஸும் சரியா போகலை.

அதனால பதிப்பகத்தை மூடிட்டேன். வீட்டுல மாட்டியிருக்குற
அப்பாவோட போட்டோவைப் பார்க்கறப்ப எல்லாம்
திருக்குறளும், குழந்தைப்பருவமும் தான் முதல்ல ஞாபகத்துக்கு
வரும். அப்பா மாதிரி திருக்குறளை அடுத்த தலைமுறைக்கு
கொண்டு சேர்க்கணும்னு தோணுச்சு.

பாடப்புத்தகத்துல இருந்தாலும் அதை குழந்தைங்க
பரீட்சைக்காக மட்டுமே படிக்கிறாங்க. புத்தகமா போட்டு
மலிவான விலையில் கொடுத்தாலும் யாரும் வாங்க
மாட்டங்கிறாங்க. குழந்தைகளோடு நெருக்கமா இருக்குற
ஒரு பொருளோடு திருக்குறளையும் சேர்த்துக் கொடுத்தா
சுலபமா அது அவங்களோடு சேர்ந்திடும்னு நம்பினேன்.

அப்படி நெருக்கமா இருக்குற ஒண்ணுண்ணா அது பென்சில்
தான். இப்படித்தான் இந்த திருக்குறள் பென்சில் உருவாச்சு…’’
என்றவர் இதை காகிதத்தில் தயாரிப்பதற்கான
காரணங்களையும் பட்டியலிட்டார்.

‘‘பொதுவா பென்சில்களை மரத்தில் இருந்துதான் செய்றாங்க.
செயற்கையா சில வேதிப்பொருட்களைக் கொண்டும்
தயாரிக்கிறாங்க. இதனால இயற்கை பெருமளவுல
அழிக்கப்படுது.

நாம செய்யப் போகிற காரியம் இயற்கையைப் பாதிக்காத
வகையில இருக்கணும்ங்கிற விஷயத்துல உறுதியா இருந்தேன்.
இதையும் திருக்குறள்ல இருந்துதான் கத்துக்கிட்டேன்.

சீனா போன்ற நாடுகள்ல காகிதங்களைப் பயன்படுத்தி
பென்சில்கள் தயாரிப்பதைப் பற்றி கேள்விப்பட்டேன். நாமும்
ஏன் அந்த மாதிரி செய்யக்கூடாதுனு எண்ணி இதுல
இறங்கினேன்.

ஆரம்பத்துல சரியா வரலை. போகப்போக பிரமாதமா வந்தது.
இப்ப முற்றிலும் மறுசுழற்சி செய்யப்பட்ட காகிதங்களைக்
கொண்டு பென்சில்களைத் தயாரிக்கிறோம்.

உண்மையில என்னோட நோக்கம் பென்சிலைத் தயாரிப்பது
அல்ல; அதன் மூலமா திருக்குறளைப் பரப்புவது.

அதனால பென்சிலோட மேல்புறத்துல திருக்குறளைப் பிரின்ட்
செய்து, எழுத்து அழியாத அளவுக்கு லேமினேட்டும் செய்றோம்…’’
என்கிற சித்தார்த்தனின் திருக்குறள் பென்சில்
1330 குறள்களுடன் கிடைக்கிறது. ஒவ்வொரு பெட்டியிலும்
ஒரு அதிகாரத்தை தாங்கி வரும் 10 பென்சில்கள்.

இதுபோக எளிதான கணக்கு வாய்ப்பாடு, போக்குவரத்து விதிகள்,
தமிழ் மற்றும் ஆங்கில எழுத்துகளைத் தாங்கியும் பென்சில்கள்
வருகின்றன

.‘‘முகநூல் வழியாவும் ஆன்லைனிலும் வேண்டியவர்களுக்கு
அனுப்பறோம். கடைகளுக்குக் கொடுப்பதில்லை. அமெரிக்கா,
சிங்கப்பூர்ல இருக்குற தமிழ்ப் பள்ளிகள் நிறைய ஆர்டர்
கொடுத்து வாங்கியிருக்காங்க.

அங்கே இந்த பென்சிலுக்கு நல்ல வரவேற்பு கிடைத்திருக்கு.
திருக்குறள் எல்லா குழந்தைகளையும் சென்றடையணும்…’’
என்றார் நிறைவாக.

———————————————–

பென்சில் வரலாறு!

பென்சிலைப் பற்றி பல வரலாறுகள் இணையத்தில் உலா
வருகின்றன. ‘‘இரண்டாயிரம் வருடங்களுக்கு முன்பு
ரோமானியர்களின் காலத்திலேயே பென்சில் பயன்பாட்டுக்கு
வந்துவிட்டது. அ

அது நீளமான கம்பி வடிவத்தில் இருந்தது…’’ என்கின்றனர்
சிலர். இன்னொரு பிரிவினர் ‘‘16-ம் நூற்றாண்டில் இத்தாலியில்
மரத்தாலான பென்சில் கண்டுபிடிக்கப்பட்டது…’’என்கின்றனர்.

ஆனால், ‘‘1795-இல் பிரான்ஸை சேர்ந்த ஓவியரான
நிக்கோலஸ் கான்டே என்பவர் தான் இப்போது நாம் பயன்படுத்தும்
பென்சிலுக்கு காரணகர்த்தா…’’ என்கின்றனர் வேறு சிலர்.

‘‘பென்சிலின் மையத்தில் ‘கிராஃபைட்’ என்கிற வேதிப்பொருள்
உள்ளது. இது இங்கிலாந்தில் உள்ள சீத்வைட் பள்ளத்தாக்கில்
தான் முதன் முதலாக கண்டுபிடிக்கப்பட்டது.

இந்த கிராஃபைட்டை களிமண்ணுடன் சேர்த்து செங்கல் சூளையில்
பென்சிலை உருவாக்கியது நிக்கோலஸ் தான்…’’ என்று
உறுதியாகச் சொல்கின்றனர் அந்த வேறு சிலர்.


—————————————-
– த.சக்திவேல்
நன்றி-தினகரன்

பூ ஒன்று தொழிலானது!

உத்தரப் பிரதேச மாநிலம் கான்பூர் நகரிலிருந்து சரியாக
25 கிலோ மீட்டர் தூரத்தில் அமைந்துள்ளது பஹுண்டி என்கிற
கிராமம்.

இந்த கிராமமே 24 மணி நேரமும் பூ நறுமணத்தால் பூரித்துக்
கொண்டிருக்கிறது. காரணம், அங்கிருக்கும்
‘ஹெல்ப் அஸ் க்ரீன்’ என்று பெயர் சூட்டப்பட்ட கட்டிடம்.

இங்கே தினமும் ஏராளமாக பூக்கள் சேகரிக்கப்பட்டு,
அதிலிருந்து ஊதுபத்தி, சாம்பிராணி மற்றும் உரம் தயாரிக்கும்
தொழிற்சாலை இயங்கி வருகிறது.

நண்பர்களான அங்கித் அகர்வால் மற்றும் கரண் ரஸ்தோகி
என்கிற இரு இளைஞர்கள்தான் பூவை வைத்து கவிதை
எழுதி காலத்தை வீணாக்காமல், அதை ஒரு வெற்றிகரமான
தொழிலாக மாற்றியிருக்கிறார்கள்.

அங்கித் அகர்வாலிடம் தொலைபேசியில் தொடர்பு கொண்டு
பேசினோம். “என்னோட சொந்த ஊர் புனே.
நான் காலேஜ் வரைக்கும் அங்கேதான் படிச்சேன்.
ஐடி என்ஜினியரிங் முடிச்சிட்டு புதிய கண்டுபிடிப்பு மற்றும்
சுயதொழில் தொடர்பான முதுநிலைப் படிப்பும் படிச்சேன்.

ஒரு ஐடி நிறுவனத்தில்தான் வேலை. செக்குமாடு மாதிரி
சுத்திக்கிட்டே இருக்கிற இந்த வேலை கொஞ்சம் போரடிச்சது.
லைஃபுன்னா அட்வெஞ்சர் வேணும்னு நெனைச்சேன். சொந்தத்
தொழில் தொடங்கினாதான் சவால் இருக்கும்.

அதுக்குன்னு திடீர்னு வேலையை விட்டுட்டு, பெரிய முதலீடு
போட்டு தொழில் தொடங்கக்கூடிய சூழலும் எனக்கு இல்லை.
எனக்கான நேரத்துக்காக நான் காத்துக்கிட்டு இருந்தேன்.”

“கரண், உங்களோட எப்படி சேர்ந்தார்?”

“அவனும், நானும் சின்ன வயசுலே இருந்தே நெருங்கிய நண்பர்கள்.
ஒண்ணாதான் டியூஷன் படிச்சோம். அப்போ ஏற்பட்ட நட்பு,
இப்போ தொழில் வரை தொடர்ந்துக்கிட்டு இருக்கு.

எங்க ரெண்டு பேருக்குமே எப்போதும் சுற்றுச்சூழல் மீது
அக்கறை உண்டு. அதுக்கு ஏதாவது செய்யணும்னு பேசிக்கிட்டு
இருப்போம். கரண் படிப்பு முடிச்சிட்டு காலநிலை மாற்றம்
மற்றும் கார்பன் பாதிப்புகள் குறித்து ஆய்வுக் கட்டுரை எழுதினார்.

நானோ வாகன டயர்களால் ஏற்படும் சுற்றுச்சூழல் பாதிப்பு
குறித்து ஆய்வு செய்தேன். சுற்றுச்சூழல் குறித்து 13 ஆய்வு
கட்டுரைகளை எழுதி இருக்கேன்.

இப்படி எங்களுக்குள் சுற்றுச்சூழல் ஒரு கொள்கையாக ஊறிப்
போய் இருந்த சமயத்தில்தான், ஒரு நாள் நானும் கரணும் கங்கை
கரை ஓரமா அமர்ந்து பேசிக்கிட்டு இருந்தோம்.

கங்கை புனிதமான நதின்னு சொல்றோம். ஆனா அதை எவ்வளவு
மாசு படுத்தி இருக்காங்கன்னு நேர்லே பார்த்தாதான் தெரியும்.
புனிதம்ன்னு சொல்லி சொல்லியே கங்கையில் எல்லா
குப்பையையும் கொட்டுவது வழக்கமாயிடுச்சு.

கான்பூரில் உள்ள கோயில்கள், மசூதிகள் மற்றும் குருத்வார்களில்
இருந்து மட்டும் வருடத்துக்கு பல லட்ச டன் பூக்களை கங்கையில்
கொட்டுவது வழக்கம்.

கோயில் பூக்களை குப்பையில் கொட்டக்கூடாது
அதற்கு பதில் ஆற்றில் கொட்டலாம் என்பது அவர்களது வாதம்.

————————————-

ஆற்றில் கொட்டுவதால், அதில் உள்ள உயிரினங்கள் எவ்வாறு
பாதிக்கப்படுகிறது என்பது பலருக்கு தெரிவதில்லை.
தண்ணீர் மாசு அடைவது மட்டும் இல்லாமல், நீர்வாழ் உயிரினங்கள்
எல்லாம் இறந்துவிடும் அபாயம் உள்ளது. இது எங்களுக்கு தெரியும்.

ஆனால் மக்களுக்கு இதனை புரிய வைக்க முடியுமா?
முயற்சி செய்தால் கண்டிப்பா செயல்படுத்த முடியும்ன்னு தோணுச்சு.
பூக்கள் நதியில் கொட்டுவதற்காக அல்ல, அதை வெச்சு தொழில்
பண்ணலாம்னு தோணுச்சி. ரெண்டு பேரும் சேர்ந்து செய்யலாம்னு
பேசினோம்.”

“எப்படி ஆரம்பிச்சீங்க?”

‘‘என் அம்மாகிட்ட சொன்ன போது, ‘என்ன, லட்சக்கணக்கில்
சம்பளம் வாங்குற வேலையை விட்டுட்டு குப்பையில் இருக்கும் பூவை
சேகரிக்க போறியா’ன்னு கோபமா கேட்டாங்க.

கரண் வீட்டிலும் அதெல்லாம் வேணாம்ன்னு சொன்னாங்க.
ஆனா, நாங்கதான் தீவிரமா இருந்தோம். என்னதான் பூவாக
இருந்தாலும், அது குப்பை தான். குப்பையில் இருந்து மண்புழு
உரம் தயாரிக்கலாம்.

பூவில் இருந்து ஏன் தயாரிக்க முடியாதுன்னு தோணுச்சு.
கையில் இருந்த எழுபத்தி ரெண்டு ஆயிரத்தை முதலாக போட்டுத்
துவங்கினோம். நிறுவனம் துவங்கியதும் முதலில் அதற்கான
ஆய்வில் ஈடுபட்டோம்.

நாங்க இருவருமே சுற்றுப்புறச்சூழல் மேல் ஈடுபாடு கொண்டவர்கள்
தான். ஆனால், முறையான ஆய்வாளர்கள் கிடையாது. தாவிரவியல்
பேராசிரியர்கள், விவசாயிகள், உரம் தயாரிப்பவர்கள்,
பூ விற்பனையாளர்கள், கோயில் நிர்வாகிகள்ன்னு ஒருத்தரையும்
விட்டு வைக்கல. எல்லாரிடமும் பேசினோம்.

அதே போல பூக்களை எப்படி மக்க செய்வது, அதில் இருந்து
மண்புழு உரம் தயாரிப்பதுன்னு யோசிச்சோம். ஆடு, மாடு,
குதிரைன்னு எல்லாவற்றின் சாணத்தையும் பயன்படுத்தி
பார்த்தோம். ஆறு மாசம், ஏகப்பட்ட ஆய்வு.

கடைசியாக காபி பொடி சேர்த்துப் பார்த்தோம். அதில் தான்
நாங்க நினைச்சப்படி மண்புழு உரம் தயாராச்சு. எந்த ஒரு
ரசாயனமும் கலக்கப்படாத முழுக்க முழுக்க ஆர்கானிக் உரம்.

‘மிட்டி’ (மண்) ன்னு பெயர் வச்சோம்.”“ஊதுபத்தி,
சாம்பிராணியெல்லாம் பிற்பாடு சேர்ந்ததா?”

‘‘உரத்தோடு நிக்கல. அடுத்து என்ன செய்யலாம்ன்னு
யோசிச்சோம். பூக்களுக்கு நறுமணத்துக்கு ஏற்ப ஏதாவது
செய்யலாம்ன்னு கரண் சொன்னான்.

ரோஜா மல்லிகைன்னு நறுமண திரவியங்கள் மார்க்கெட்டில்
இருக்கு.அதை வேறு விதமாக பயன்படுத்த நினைச்சோம். ஊதுபத்தி,
சாம்பிராணி தயாரிக்கலாம் பல்ப் எறிஞ்சது. அதற்கான ஆய்வில்
இறங்கினோம். பொதுவாக ஊதுபத்தி மற்றும் சாம்பிராணிகள்
நிலக்கரித் துண்டில்தான் தயாரிப்பாங்க.

விரும்பி வடிவம் செய்து அதை நறுமண திரவியத்தில் முக்கி
எடுத்து காயவைத்தால் ஊதுபத்தி சாம்பிராணி தயார். நிலக்கரிக்கு
பதில் ஏன் பூக்களை பயன்படுத்தக்கூடாதுன்னு தோணுச்சு.

சேகரிச்ச பூக்களை காயவச்சு பொடித்து, அதில் தேவையான
நறுமணங்களை சேர்த்து ஊதுபத்தி மற்றும் சாம்பிராணிகளை
தயாரிக்க ஆரம்பிச்சோம்.”

“குப்பையிலிருந்து மின்சாரம் எடுக்கலாம். நீங்க பூவை மட்டும்
எப்படி பிரிச்சி எடுத்தீங்க?”

‘‘குப்பைகளை அகற்றும் பொறுப்பு நகராட்சியை சார்ந்தது.
அவங்க வேலையில் நாம் ஈடுபடுவது அவ்வளவு சுலபமில்லை.
அதற்கு அவர்களிடம் நாம் முறையாக அனுமதி பெறணும்.

அதற்கு பதில் குப்பைக்கு வரும் முன் அந்த பூக்களை அதன்
ஆதிமூலத்தில் இருந்தே சேகரிக்க நினைச்சோம். பெரும்பாலான
பூக்கள் கோயில்களில் தான் அதிகம் கடவுளுக்கு சாத்தப்படுகிறது.

அங்கிருந்துதான் குப்பை தொட்டிக்கு செல்கிறது. நேரடியாக
கோயில் நிர்வாகிகளை அணுகினோம். கோயிலில் இருந்து
பெறப்படும் பூக்களுக்கு நகராட்சியிடம் அனுமதி பெறவேண்டும்
என்ற அவசியம் இல்லை.

————————————

கான்பூரை சுற்றியுள்ள கோயில் மற்றும் மசூதிகளுக்குச் சென்று,
அவர்களிடம் பூக்களை நாங்க எடுத்துக் கொள்வதாக கூறினோம்.
அவர்களுக்கும் வேலை மிச்சம் என்பதால் சரி என்றனர்.

ஒவ்வொரு கோயில் மற்றும் மசூதிகளில் நீலநிற குப்பைத்
தொட்டியை வைச்சோம். அவங்க அதில் பயன்படுத்திய பூக்களை
போட்டு வைப்பாங்க. தினமும் காலை எங்க நிறுவன வண்டி
சென்று, பூக்களை சேகரிக்கும். பூக்களை ரக வாரியாக பிரிப்போம்.

பிறகு பூக்களை நாரில் இருந்து தனியாக பிரித்து அதன் இதழ்களை
மட்டும் சேகரிப்போம். இதில் மிகவும் மக்கி இருக்கும் பூக்களை
தனியாக எடுத்து அதை மண்புழு உரம் தயாரிக்க பயன்படுத்திக்
கொள்வோம் மற்ற பூக்கள் ஊதுபத்தி மற்றும் சாம்பிராணி
தயாரிக்க.

தற்போது எங்கள் நிறுவனத்தில் நூற்றுக்கும் மேற்பட்ட பெண்கள்
வேலை பார்க்கிறார்கள். எங்களின் நோக்கமே, பெண்களுக்கு
வேலை வாய்ப்பு ஏற்படுத்தி தரவேண்டும் என்பது தான்.

பூக்களை பிரிப்பது முதல் அதை ஊதுபத்தியாக மாற்றுவது வரை
எல்லாமே இங்கு பெண்கள்தான்.”

“எங்க தமிழ்நாட்டில் ‘தெர்மாக்கோல்’ ரொம்ப ஃபேமஸ்.
பூக்களிலிருந்து தெர்மாக்கோல் தயாரிக்க முடியுமா?”

‘‘அதை வெச்சு அணையில் தேக்கி வைத்த நீர் ஆவியாகிறதை
தடுக்கலாம்னு தமிழ்நாட்டில் கண்டுபிடிச்சிருக்காங்கன்னு
நாங்களும் பேப்பரில் படிச்சோம் (சிரிக்கிறார்).

எங்களின் தொழில் பூக்கள் என்றாகிவிட்டது. அதனால் இதில்
இருந்து என்னென்ன செய்ய முடியும்ன்னு யோசிப்பது தான்
எங்க வேலையே.

தெர்மாக்கோல், பேக்கேஜிங் மெட்டீரியல் உலகம் முழுக்க
பரவலான பயன்பாட்டில் இருக்கிறது. ஃப்ரிட்ஜ், டீவி,
வாஷிங் மெஷின் எதுவாக இருந்தாலும் அதை தெர்மாக்கோல்
கொண்டுதான் பேக் செய்வது வழக்கம்.

இது ஒரு ஸ்பாஞ்ஜ். பொருள் சேதமடையாமல் பாதுகாக்கும்.
மக்கிப் போகாது. அதற்கு மாற்று ‘புளோரா ஃபோம்’. பூக்கள்
மூலமாக தயாரிக்கப்படும் தெர்மாக்கோல்தான் அது.

இது எளிதாக மக்கும் என்பதால் சுற்றுச்சூழலுக்கும் ஆபத்து
இல்லை. புளோரா ஃபோமை பிரபலமாக்கும் எண்ணம்
எங்களுக்கு இருக்கிறது.”

“அடுத்து?”‘‘ஊதுபத்தி, சாம்பிராணி கடவுளின் பொருள்
என்பதால் சாம்பிராணி பாக்கெட்டில் சாமி படம் போட்டு
இருந்தோம். சாமிப்படம் இருப்பதால் அதை குப்பைத்
தொட்டியில் போட மக்கள் தயங்கினாங்க.

அதையே விதை பாக்கெட்டாக மாத்தினால் என்னன்னு
யோசிச்சோம். சாம்பிராணியை பயன்படுத்திட்டு பாக்கெட்டை
மண்ணில் புதைச்சிடலாம். அதில் இருந்து ஒரு அழகான செடி
முளைக்கும்.

அடுத்து லெதர் தயாரிக்கும் ஆய்வில் ஈடுபட்டு வறோம்.
கூடிய விரைவில் மக்கி போகும் லெதர் பொருட்கள் மற்றும்
பைகளை அறிமுகம் செய்யும் எண்ணம் உள்ளது.

தற்போது எங்களின் பொருட்கள் ஆன்லைனில் தான்
கிடைக்கிறது. இன்னும் ஒரு மாதத்தில் எல்லா முக்கிய நகர
சூப்பர் மார்க்கெட்டிலும் விற்பனை செய்ய இருக்கிறோம்.’’

————————

– ப்ரியா
நன்றி- தினகரன்

மரங்களுக்காக உயிர்விட்ட 363 பேர்

IMG_1724.jpg

IMG_1725.jpg

என்னிடம் காய்கறி வாங்குபவரகளுக்கு ஐந்து நன்மைகள்…!!

ஒரு தள்ளுவண்டியில் காய்கறி வியாபாரம் செய்யும் ஒருவரின்
வித்தியாசமான சப்தம் என்னைக் கவர்ந்தது.
“சார் என்னிடமிருந்து காய்கறிகள் வாங்கினால், சூப்பர்
மார்க்கெட்டுகளில் இருந்து காய்கறிகள் வாங்குவதை விட
உங்களுக்கு ஐந்து நன்மைகள் அதிகம் அந்த நன்மைகள்
என்னவென்று தெரிய வேண்டுமா”.

திரும்பி பார்த்தேன். ஒரு அழுக்கு கைலியும் சட்டைக்கு பதில்
தோளில் ஒரு துண்டும்அணிந்த ஒரு இளைஞன். பக்கத்தில்
இருந்த செயறில் ஆறேழு வயதில் ஒரு பையன். அவன்தான்
கேஷியர் என்று நினைக்கிறேன். நான் வாங்க நினைத்த
என்னுடைய லிஸ்ட்டிலுள்ள அனைத்து காய்கறிகளும் இவரிடமும்
இருக்கிறது. இன்று இவரிடமிருந்து வாங்கினாலென்ன?.
(வீட்டுக்காரிக்கு தெரிய வேண்டாம்).

“அந்த ஐந்து நன்மைகள் என்ன என்று நான் தெரிந்து
கொள்ளலாமா”.

கண்டிப்பாக….. சார் என்னிடமிருந்து வாங்கும் காய்கறிகளுக்கு
நீங்கள் ஜி எஸ் டி தரவேண்டாம். நூறு ரூபாய்க்கு ஐந்து ரூபாய்
லாபம். முதல் நன்மை.

சார் நீங்கள் வாங்கும் பொருட்களை கொண்டு போக நான்
தரும் கவர் ஃப்றீ… சூப்பர் மார்க்கெட்டில் இந்த கவருக்கு
குறைந்தது ஐந்து ரூபாய் தர வேண்டும்.
( நாம் காசு கொடுத்து வாங்கும் கவரில் அவர்களுடைய
விளம்பரம்). இது இரண்டாவது நன்மை.

மூன்றாவது நன்மை என்ன என்று அறிய ஆவலுடன் அவரைப்
பார்த்தேன். சார் சூப்பர் மார்க்கெட்டில் அவர்கள் கேட்கும்
விலையை நீங்கள் கொடுக்க வேண்டும். எங்களிடம் நீங்கள்
விலை பேசி வாங்கலாம்.

நூறு ரூபாய் பொருளை 80 ரூபாய்க்கு கேட்டாலும் தருவோம்.
ஏனென்றால் எங்கள் வயிற்றுப்பிழைப்பு இது. எங்களுக்கு
வேறு வருமானம் ஒன்றும் இல்லை. 20 ரூபாய் லாபம்
இது மூன்றாவது நன்மை.

சரிதான் என்று தலையாட்டிவிட்டு அவரையே பார்த்தேன்.
“சார் நான்காவது இந்த காய்கறிகள் பக்கத்து கிராமங்களில்
நாங்களே இயற்கையாக பூச்சிக்கொல்லி மருந்துகள் ஒன்றும்
தெளிக்காமல் விவசாயம் செய்தது.
இந்த காய்கறிகளை சாப்பிடுவதால் உடலுக்கு எந்த தீங்கும்
வராது சார்…

அவர் சொல்வது அனைத்தும் சரியாகவே எனக்கு பட்டது.
மேலும் சூப்பர் மார்க்கெட்டுகளில் அவர்கள் கேட்கும் விலையை
கொடுத்து, விஷம் சேர்த்த காய்கறிகளை கியூவில் நின்று
வாங்குவதற்கு தயாராகும் நாம் இதையெல்லாம்
சிந்திக்கிறோமா?…..

சிந்தனையில் நிற்கும்போதே நான் கொடுத்த லிஸ்டில் உள்ள
காய்கறிகளை பேக் செய்து கொடுத்தார்.
அவர் கேட்ட தொகையை கொடுத்தேன். பிறகு நான் அவரிடம்
, “எல்லாம் சரி ஐந்தாவது நன்மை என்னவென்று சொல்லவே
இல்லையே” என்றேன் ஆவலுடன்.

“இது என்னுடைய மனைவி இவளுக்கு இரண்டு கிட்னியும்
செயலிழந்து விட்டது. இவளுடைய மருத்துவத்திற்காக நான்
யாரிடமும் கையேந்தியதில்லை. நீங்கள் விலை பேசாமல்
கொடுத்த இந்த பணத்தின் ஒரு பகுதி இவளுடைய மருத்துவ
செலவிற்கு உபயோகப்படும்.

இதுவும் நீங்கள் செய்யும் ஒரு சாரிட்டிதான் இதற்குரிய நன்மை
இறைவனிடம் இருந்து உங்களுக்கு கிடைக்கும்.
இதுதான் நான் சொன்ன ஐந்தாவது நன்மை.

புன்னகையோடு அவர் சொல்லி நிறுத்தினாலும் அவருடைய
கண்கள் நிறைந்திருந்தது….
நானும் கண்ணீரை மறைக்க முயன்று தோற்றேன்.

இது போன்ற துக்கங்களும், துயரங்களும் வழியோரங்களில்
வியாபாரம் செய்யும் பலருக்கும் இருக்கலாம். நம்மால்
இவர்களுக்கெல்லாம் உதவ முடியுமா???.

கோடிக்கணக்கில் மூலதனமுள்ள சூப்பர் மார்க்கெட்
முதலாளிகளுக்கும், கார்ப்ரேட்டுகளுக்கும் பாக்கெட் நிறைக்க
நாம் கொடுப்பதில் ஒரு பங்கை இதைப்போன்ற வழியோர
வியாபாரிகளுக்கும் கொடுத்து உதவுவது அல்லவா உண்மையில்
தொண்டு????

————————————-
நன்றி whatsup !

« Older entries