முதல் பார்வை: எங்கிட்ட மோதாதே – ரசிகர் விருப்பம்!


ரஜினி ரசிகனுக்கும், கமல் ரசிகனுக்கும் ஏற்படும் தோழமை,
மோதல், பிரச்சினைகளே ‘எங்கிட்ட மோதாதே’.

ரஜினி ரசிகர் நட்டி நட்ராஜுக்கும், கமல் ரசிகர் ராஜாஜுக்கும்
கட்-அவுட் வரைவதுதான் தொழில். ஒரு கட்டத்தில் சொந்தமாக
தொழில் தொடங்கலாம் என்று பாலாசிங்கிடம் இருந்து பிரிந்து
வருகிறார்கள்.

நட்ராஜ் தன் சொந்த ஊரில் நண்பன் ராஜாஜ் உடன் கட்-அவுட்
வரையும் தொழில் தொடங்குகிறார். ஊரில் பிரபலமாகும்போது
ஒரு பிரச்சினை எட்டிப் பார்க்கிறது. அதனால் இருவரும்
பிரிகிறார்கள்.

என்ன பிரச்சினை, ஏன் பிரிகிறார்கள், இருவரும் என்ன ஆகிறார்கள்
என்பது மீதிக் கதை.

ரசிகர்களை மையமாக வைத்து ஒரு படம் எடுக்க முயற்சித்ததற்காக
இயக்குநர் ராமு செல்லப்பாவுக்கு வாழ்த்துகள்.

நட்டி நட்ராஜ் ரஜினி ரசிகனா தேர்ந்த நடிப்பை வழங்கியிருக்கிறார்.
ரஜினியின் மேனரிசங்களை பிரதிபலிப்பதும் ரசிக்கும்படி இருக்கிறது.
தெனாவட்டான பேச்சு, கச்சிதமான உடல் மொழியில் கவனம்
ஈர்க்கும் நட்டி படத்தை ஒட்டுமொத்தமாக தன் தோள்களில் தூக்கி
நிறுத்துகிறார்.

சண்டைக் காட்சிகளில் மட்டும் நட்டி கொஞ்சம் கவனம் செலுத்துவது
அவசியம்.

கமல் ரசிகராக நடித்திருக்கும் ராஜாஜ் நடிப்பில் பெரிதாய் எதையும்
செய்யவில்லை. அவருக்கான நடிப்புக் களம் இருந்தும் அதை
சரியாகப் பயன்படுத்திக் கொள்ளவில்லை.

கிராமத்துப் பெண்களாக சஞ்சிதா ஷெட்டி, பார்வதி நாயர் ஆகிய
இருவரும் நடித்திருக்கிறார்கள். நட்டியுடன் பேசும் தேர்தல்- பட
ரிலீஸ் சம்பந்தப்பட்ட அந்த ஒற்றைக் காட்சியில் அனுபவ நடிப்பை
வழங்கி அப்ளாஸ் அள்ளுகிறார் ராதாரவி.

வழக்கமும் பழக்கமுமான கதாபாத்திரம் என்றாலும் அதற்கான
நடிப்பை உண்மையாக கொடுத்திருக்கிறார் விஜய் முருகன். ஃபெரேரா,
முருகானந்தம் ஆகியோர் சரியான தேர்வு.

நட்ராஜன் சங்கரன் இசையில் பாடல்கள் ரசிக்கும்படி இல்லை.
பின்னணி இசை சில இடங்களில் மட்டும் பொருத்தமாக உள்ளது.
கணேஷ் சந்திராவின் கேமரா 87-88களின் காலத்தை கண்முன்
நிறுத்துகிறது.

”ரஜினி, கமலை விட அவங்க ரசிகனுக்குதான் பவர் ஜாஸ்தி”,
”நாங்க வரைஞ்சு வைச்ச கட்-அவுட்ல ஊத்துற பாலபிஷேகமும்,
வேட்டு சத்தமும்தான் எங்களுக்கு கொண்டாட்டம்” போன்ற இயக்குநர்
ராமு செல்லப்பாவின் வசனங்கள், நெல்லை வட்டார மொழி,
கட்-அவுட் உயரம், போக்குவரத்துக் கழகம், பொறி உருண்டை,
கலர் சோடா என 80களின் சில நுட்பமான சங்கதிகள் படத்தில் மிகச்
சரியாக பதிவு செய்யப்பட்டுள்ளன.
கலை இயக்குநர் ஆறுச்சாமியின் உழைப்பு ஆச்சர்யப்படுத்துகிறது.

ரசிகர்கள் இடையே நடக்கும் மோதலை பின்னணியாகக் கொண்டு
கதையை அமைக்காமல், அவர்களின் தொழில், குடும்பம், காதல்
சார்ந்த பிரச்சினைகளை மட்டுமே இயக்குநர் அதிகம் முன்னிறுத்துகிறார்.

ரசிகர்களுக்குள் எழும் வாக்குவாதம், பிரச்சினையே ரஜினியா? கமலா?
என்று வரும் போட்டிதான். அதனால்தான் உச்சகட்ட மோதல் வெடிக்கும்.
ஆனால், அதை லேசு பாசாக அணுகிவிட்டு கதையை வேறு பாதையில்
நகர்த்துகிறார் இயக்குநர் ராமு செல்லப்பா.

இரண்டாம் பாதியில் உள்ள முக்கியக் காட்சிகள் முதல் பாதியிலேயே
வந்திருக்க வேண்டும் என்று யோசிக்க வைக்கிறது. பகை என்ன என்பதை
யூகிக்க முடிவதும், அதுவே அடுத்தடுத்து தொடர்வதும், அந்தப் பகையை
முடிக்காமல் நீட்டி முழக்குவதும் அலுப்பை வரவழைக்கின்றன.

மொத்தத்தில் ‘எங்கிட்ட மோதாதே’ படம் ரசிகரின் ஆதிக்கத்தை பதிவு
செய்யாமல், விருப்பத்தை மட்டுமே பதிவு செய்கிறது.

—————————
உதிரன்
தி இந்து

காற்று வெளியிடை ஆல்பம் இன்று ரிலீஸ்!

மணிரத்னம் – வைரமுத்து – ஏ.ஆர்.ரகுமான் என்ற
கால் நூற்றாண்டைத் தொட்டிருக்கும் மகத்தான
கூட்டணியின் அடுத்த படைப்புதான்
”’காற்று வெளியிடை”.

கார்த்தி, அதிதி ராவ், ஆர்.ஜே.பாலாஜி மற்றும் பலர்
நடித்திருக்கும் இந்த படத்தின் பாடல்கள்,
ஜென்-Z இளசுகளின் மத்தியில் டாப் டிரெண்டிங்!

இந்நிலையில், முழூ ஆல்பம் இன்று அதிகாரப்பூர்வமாக
ரிலிஸாகிறது! ரவிவர்மன் ஒளிப்பதிவு செய்துள்ள இந்த
திரைப்படம், வருகின்ற ஏப்ரல் 7, 2017 அன்று திரைக்கு
வருகிறது.

இதுவரை இந்தப் படத்தின் ‘அழகியே’, ‘வான்… வருவான்’
மற்றும் ‘சாரட்டு வண்டியில’ ஆகிய பாடல்கள் ஒலி வடிவில்
மட்டுமே வெளியாகி உள்ளன.

இந்தத் திரைப்படத்தின் ட்ரெய்லர், கடந்த மார்ச் 9 அன்று
ரிலீஸானது குறிப்பிடத்தக்கது. ”காற்று வெளியிடை”
படத்தைப் பார்த்துவிட்ட சென்ஸார் குழு,
அதற்கு U சான்றிதழை அளித்துவிட்டது.

இப்படத்தின் முழு ஆல்பம் பற்றிய விபரங்களைப்
பார்ப்போம்!

சிவகார்த்திகேயனின் அடுத்த படம் மேமாதம் தொடக்கம்..!

சிவகார்த்திகேயன்

‘ரெமோ’ படத்தை தொடர்ந்து சிவகார்த்திகேயன்,
மோகன்ராஜா இயக்கத்தில் ‘வேலைக்காரன்’ படத்தில்
நடித்து வருகிறார்.

இப்படத்தில் சிவகார்த்திகேயனுக்கு ஜோடியாக நயந்தாரா,
முக்கிய வேடத்தில் பகத்பாசில் ஆகியோர் நடித்து
வருகிறார்கள். இந்நிலையில் ‘வேலைக்காரன்’ இறுதிக்
கட்டத்தை எட்டியுள்ளதால் சிவகார்த்திகேயனின் அடுத்த
படத்தின் முதற்கட்ட பணிகள் ஆரம்பிக்கப்பட்டுள்ளன.

இப்படத்தை பொன்ராம் இயக்க உள்ளார். மே மாத இறுதியில்
படப்பிடிப்பு தொடங்க திட்டமிட்டுள்ளது. ‘வருத்தப்படாத
வாலிபர் சங்கம்’, ‘ரஜினிமுருகன்’ என இரண்டு வெற்றிகளை
குவித்த சிவகார்த்திகேயன்- பொன்ராம் கூட்டணி
மூன்றாவதாக சேர்ந்துள்ளது.

இதில் மற்றொரு ஒற்றுமை பொன்ராம் போலவே
ஆர்.டி ராஜா-சிவகார்த்திகேயன் இணையும் மூன்றாவது
படமும் இதுதான்.

———————————————-
-விகடன்

 

ஒரு கார்… ஒரு பேய்… ஒரு நயன்தாரா!

நிசப்தம்

-குங்குமம் விமர்சனக்குழு

தமிழ் சினிமா இன்னும் பெருமிதம் கொள்ள ஒரு படம் ‘நிசப்தம்’. இளம்பெண்களுக்கான பாதுகாப்புக்குக் கொஞ்சமும் உத்திரவாதம் இல்லை. இன்னும் மோசமாக பெண் குழந்தைகளும் எப்படி இந்த வல்லுறவுக்கு ஆளாகிறார்கள் என்பதே கதைக் கரு. வெறும் ஆக்‌ஷனும், காமமும், கேளிக்கையும் மட்டுமே அதிகம் புழங்கும் சினிமாவில் விழிப்புணர்வுக்கு வரவேற்பு குடை விரித்ததற்கு மைக்கேல் அருணுக்கு பூங்கொத்து!

அஜய்யும், அபிநயாவும் மனமொத்த தம்பதிகள். அவர்களது மகள் சாதன்யா பள்ளிக்குப் போய்க் கொண்டிருப்பதிலிருந்து தொடங்குகிறது கதை. ஒரு மழைநாளில் பள்ளிக்கு போகும்போது வக்கிரம் பிடித்த ஒருவனின் கண்ணில்பட நடக்கக் கூடாதது நடக்கிறது. இறுதியில் சாதன்யா சகஜ நிலைக்குத் திரும்பினாளா, தர்மசங்கடமான பெற்றோர்களின் நிலை என்ன என்பதே உலுக்கி எடுக்கும் இறுதி நிகழ்வு.

மிக மிக எளிமையான ட்ரீட்மென்ட். ஆனால், அவ்வளவு வலிமையான உணர்வுகள். சாதன்யாவின் அப்பாவாக அஜய். கேரக்டருக்கு அப்படியே பொருத்தம். குழந்தை தவிர்க்க முடியாமல் இந்த நிலைக்கு ஆளானபிறகு, தன் நிலைக்குத் திரும்புவது, கொந்தளித்து எழுவது, சூழ்நிலையைப் புரிந்துகொள்வது, மகளை மீட்பது என அச்சு அசல் அப்பாவாகவே வாழ்ந்திருக்கிறார்.

எப்போதும் கண்ணில் பெரும் சோகத்தோடு, அப்பாவைப் பார்க்கவே மனம் கொள்ளாமல் மகள் முகத்தை மறைக்கும் வேளையில் அழுது, அரற்றி, உயிர் துடிக்கும் வகையில் துடிப்பது மாஸ்டர்பீஸ்! மனைவியாக அபிநயா நல்ல தேர்வு. ஆரம்பத்தில் அழுது துடிப்பவர், பின்பு சூழலை அனுசரித்து யதார்த்தத்திற்குத் திரும்பி, மகளை பழைய நிலைக்குத் திருப்புவது அழகு.

அஜய்க்கு துணை நிற்கும் பழனி, ஹம்சா, சாதன்யாவின் பள்ளித் தோழர்கள், உளவியல் நிபுணராக ருத்து என அத்தனை பேரும் அழகான தேர்வுகள். படம் முழுக்க இதயம் தொடும் வசனங்கள் பெரிய பலம். ‘நீங்க ரெண்டு பேரும் பிஸியாக இருப்பீங்கனுதான் 100க்கு போன் பண்ணிச் சொன்னேன்’ என நடந்த சம்பவத்திற்குப் பிறகு சாதன்யா பேசும்போது மெல்லிய இதயங்கள் உருகிக் கரைந்துவிடும்.

எவ்வளவு கொடியவர்களுக்கும் நீதி வளைந்து கொடுக்கத் தயாராகவும், அவர்களுக்கான நியாயங்களும் இருக்கின்றன என்பதைக் காட்டிய விதத்திலும் இயக்குநர் முத்திரை பதிக்கிறார். ஒவ்வொரு சூழ்நிலையிலும் பொதுவாழ்வின் மீதான அக்கறை தொனிப்பதற்கு கூடுதல் வணக்கம்! மறைந்த நா.முத்துக்குமாரின் பாடல்கள் நுண்ணிய உணர்வில் நெகிழ்த்துகின்றன.

நமக்கு அருகில் இருக்கிற வீட்டில் இத்தனை சம்பவங்கள் நடப்பது போன்ற நெருங்கிய உணர்வை ஏற்படுத்துகிறார் அறிமுக ஒளிப்பதிவாளர் எஸ்.ஜே. ஸ்டார். ஒவ்வொரு பதற்ற வேளையிலும்அறிமுக இசையமைப்பாளர் ஹான் ஜஸில் தன் கடமையை அற்புதமாகச் செய்கிறார். மனிதம் பேசும் படம்… நம் சிறார்களின் பாதுகாப்பை பேசும் ‘நிசப்த’த்திற்கு ஒரு ராயல் சல்யூட்!

மொட்ட சிவா கெட்ட சிவா

-குங்குமம் விமர்சனக்குழு

பொறுக்கி போலீஸ் திருந்தி, மக்கள் போலீஸாக மாறுவதே ‘மொட்ட சிவா கெட்ட சிவா’! சகலவிதமான ஊழல்களையும், அதிரடிகளையும் செய்து சம்பாதிக்கிறார் லாரன்ஸ். தலைநகருக்கு வந்து இன்னும் சம்பாதிக்க ஓர் அமைச்சரை இக்கட்டிலிருந்து அதிரடி ஆக்‌ஷனில் விடுவிக்கிறார். விதவிதமாகக் கொள்ளை அடிக்க, சக போலீஸாருக்கு கட்டளைகள் பிறப்பிக்கிறார்.

இவ்வளவு கெட்டவரான லாரன்ஸ், மீண்டும் நல்லவனாகி ரவுடிகளை ஆக்‌ஷனில் போட்டுத் தள்ளி அள்ளிக் கட்டுவதுதான் கிளைமாக்ஸ். கெட்டவன் நல்லவனாகிற இரண்டு வரி ஸ்டேட்டஸ் கதையை ஊதியே நெருப்பாக்கியிருக்கிறார் டைரக்டர் சாய்ரமணி. ‘பட்டாஸ்’ தெலுங்கு சினிமாவிற்கு தமிழ் வர்ணம் அடித்தாலும் ஆங்காங்கே அடிக்கிறது தெலுங்கு வாசனை.

அடிதடி, கலாட்டா, மகிழ்ச்சி, அதிர்ச்சி, கோபம், காதல் என எதிலும் துடிப்புடன் இருப்பதில் லாரன்ஸ் எப்போதும் பொருந்திப் போகிறார். ஆனால், தியேட்டரை விட்டு வெளியேறிய கணத்தில் இவ்வளவு பெரிய படத்தில் நிஜம் எங்கேயாவது நடந்திருக்கிறதா என முட்டி மோதுகின்றன சந்தேகங்கள். ஆக்‌ஷனில் போட்டுத் தள்ளுவதோடு, கெட்ட ஆட்டம் ஒன்றிற்கு மூன்றாக போட்டு ஆடித் தள்ளுவதில் மனிதர் பக்கா! அவ்வளவு உயர அசுதோஷ் ராணாவை நேரிலே வைத்து சலம்பும்போது லாரன்சின் கொடி பறக்கிறது.

இறங்கி அடித்திருக்கிறார் நிக்கி கல்ராணி. எக்கச்சக்க கிளாமரில், கூச்சத்திற்கு விடை கொடுக்கும் நெளிவு சுளிவுகளில் இளமை. ஒரே ஒரு ஆட்டம் போட்டாலும் லட்சுமிராய் அந்த உயரத்திற்கு, அந்த ஆட்டத்திற்கு அட்டகாச ஃபிட். செம ஜில். ஆறடிக்கு மேலான அசுதோஷ் ராணா அட்டகாசம். ஆனால், தமிழ்த்தனம்தான் ஒட்டமாட்டேன் என்கிறது.

தம்பி ராமையா, விடிவி கணேஷ், சாம்ஸ், மயில்சாமி, மொட்டை ராஜேந்திரன் இருந்தாலும் கூடவே லாரன்சும் காமெடிக்கு கை கொடுக்கிறார். அடுத்தடுத்து வருகிற அத்தனை சீன்களையும் வரிசையாக சொல்லி விடலாம். ஆனாலும் உட்கார்த்தி வைப்பதுதான் ஆச்சர்யம். சத்யராஜ் கமிஷனராக வந்தாலும், ஏஎஸ்பி லாரன்சுக்கு அடங்கிப் போகிறார். அப்புறம் மகன் – அப்பா என சென்டிமென்ட் ட்ரிப்பில் கதை போய்விடுகிறது.

சத்யராஜுக்கு ஊதித் தள்ளி விடக்கூடிய கதாபாத்திரம். அவ்விதமே செய்கிறார். சர்வேஷ் முராரி காமிரா விறுவிறு சுறுசுறு. ஆட்டம் பாட்டம், ஆக்‌ஷன் என்றால் மட்டும் அந்தக் கேமிராவிற்கு கொண்டாட்டம்தான். வஞ்சனையே இல்லாமல் குத்துப் பாடல்களை மட்டுமே தந்திருக்கிறார் அம்ரிஷ். ‘ஆடலுடன் பாடலைக் கேட்டு ரசிப்பதுதான் சுகம் சுகம்’ பாட்டு ரீமிக்ஸ்… மெல்லிசை மன்னரின் ஆவி மன்னிக்காது. காய்ச்சி எடுக்கும் கமர்ஷியல் ஆக்‌ஷன்!

இளையராஜா பாடல்களை பாட எஸ்பிபிக்கு தடை


சென்னை:
அமெரிக்காவில் இசைநிகழ்ச்சி நடத்தும் திரைப்பட
பின்னணி பாடகர் எஸ்.பி.பாலசுப்ரமணியம் தான்
இசையமைத்த பாடல்களை பாடக்கூடாது என
திரைப்பட இசையமைப்பாளர் இளையராஜா வழக்கறிஞர்
நோட்டீஸ் அனுப்பியுள்ளார்.

பின்னணி பாடகர் எஸ்.பி.பாலசுப்ரமணியம் பேஸ்புக்கில்
வெளியிட்ட செய்தி: கடந்த வாரம் அமெரிக்காவின் சியாட்டில்,
லாஸ் ஏஞ்சல்ஸ் நகரில் நடந்த இசை நிகழ்ச்சிகள் சிறப்பாக
இருந்தன.

ஏற்பாட்டாளர்கள் நிகழ்ச்சியை சிறப்பாக செய்திருந்தனர்.
எங்கள் மீது அன்பு காட்டிய ரசிகர்கள் குறித்து பெருமைப்
படுகிறோம்.

சட்ட நடவடிக்கைகள் :
சில நாட்களுக்கு முன், இளையராஜா வழக்கறிஞர் சார்பில்
எனக்கும், என்மகன் சரண், பாடகி சித்ராவுக்கும் வழக்கறிஞர்
நோட்டீஸ் வந்தது. அதில், அமெரிக்காவில்பல இடங்களில்
நடைபெற உள்ள இசை நிகழ்ச்சிகளில், இளையராஜா
இசையமைத்த பாடல்களை அவரது அனுமதி பெறாமல்
நாங்கள் பாடக்கூடாது.

தடையை மீறி பாடினால், அதிக அபராதம் கட்ட வேண்டியதுடன்
சட்ட நடவடிக்கைகளை எதிர்கொள்ள வேண்டியிருக்கும் என
தெரிவிக்கப்பட்டுள்ளது.
இதுபோல் சட்ட விதிகள் உள்ளது எனக்கு தெரியாது.

‛எஸ்பிபி 50′ என்ற இசை நிகழ்ச்சியை எனது மகன் கடந்த
ஆகஸ்ட் மாதம் ஏற்பாடு செய்தார். டோரன்டோ நகர், ரஷ்யா,
இலங்கை, மலேசியா, சிங்கப்பூர், துபாய் மற்றும் இந்தியாவின்
பல நகரங்களில் இசை நிகழ்ச்சி நடத்தியுள்ளோம்.

அப்போது இளையராஜா தரப்பிலிருந்து எந்த தகவலும்
வரவில்லை.
முன்னர் நான் கூறியது போல், இது பற்றிய சட்டம் எனக்கு
தெரியாவிட்டாலும் சட்டத்தை மதிக்க வேண்டும். கீழ்படிய
வேண்டும்.

ரசிகர்களுக்கு வேண்டுகோள்:
இதுபோன்ற சூழ்நிலையில், இளையராஜா இசையமைத்த
பாடல்களை எங்களது குழுவால் இனிமேல் பாட முடியாது.
ஆனால், இசை நிகழ்ச்சிகள் நடக்க வேண்டும். கடவுள் அருளால்,
மற்ற இசையமைப்பாளர்களின் இசையில் பல பாடல்களை
பாடியுள்ளேன்.

அவற்றை பாடுவேன். வழக்கம்போல் இசை நிகழ்ச்சிகளுக்கு
ஆதரவு தருவீர்கள் என்ற நம்பிக்கை உள்ளது. உங்களின்
அன்புக்கும் ஆதரவுக்கும் எப்போதும் கடமைப்பட்டுள்ளேன்.

இந்த விவகாரத்தில் ரசிகர்கள் எந்த விவாதமும் நடத்த
வேண்டாம். மோசமான கருத்துகளை தெரிவிக்க வேண்டாம்.
இதனை கடவுள் திட்டமிட்டிருந்தால் அதற்கு நான் அடிபணிய
வேண்டும். இவ்வாறு எஸ்பிபி கூறியுள்ளார்.

————————————-
தினமலர்

தமிழ் சினிமாவில் ஹீரோவாக அறிமுகமாகும் அமலாபாலின் தம்பி

அமலாபாலின் தம்பி அபிஜித் பால். இவர் ஏற்கெனவே ஒருசில மலையாள படங்களில் நடித்துள்ளார். மோகன்லால்-அமலாபால் இணைந்து நடித்த ‘லைலா ஓ லைலா’ படம்தான் இவர் அறிமுகமானது. தமிழில் பிரபுதேவா-தமன்னா நடிப்பில் வெளிவந்த ‘தேவி’ படததில் ஒரு சிறிய கதாபாத்திரத்தில் நடித்திருந்தார்.

இந்நிலையில், அபிஜித் ஒரு படத்தில் ஹீரோவாக நடிக்கவிருக்கிறார். இவர் ஹீரோவாக அறிமுகமாகும் அந்த படத்தை விஜய்ஸ்ரீ என்பவர் இயக்குகிறார். இந்த படத்தின் இரண்டு சிறப்பம்சங்களும் இடம்பெற்றிருக்கிறதாம். அதாவது இந்த படத்தில் இடைவேளை என்பதே கிடையதாம். அதேபோல், இப்படத்தில் பாடல்களும் கிடையதாம்.

இப்படம் குறித்த மேலும் பல தகவல்கள் விரைவில் வெளிவரும் என எதிர்பார்க்கப்படுகிறது. இப்படத்திற்கான கதாநாயகி மற்றும் பிற நடிகர், நடிகையர்கள் தேர்வு விறுவிறுப்பாக நடைபெற்று வருகிறது.

 –
மாலைமலர்

நயன்தாரா இடத்தில் தமன்னா: வில்லனாகும் பிரபுதேவா

நயன்தாரா இடத்தில் தமன்னா: வில்லனாகும் பிரபுதேவா
நயன்தாரா இடத்தில் தமன்னா இருப்பதாகவும்,
அவருக்கு வில்லனாக பிரபுதேவா இருப்பதாகவும்
செய்திகள் வெளியாகியுள்ளது.
இதுகுறித்த செய்தியை கீழே விரிவாக பார்ப்போம்.
நயன்தாராவும், பிரபுதேவாவும் காதலர்களாகி திருமணம்
வரை சென்று பின்னர் பிரிந்துபோனார்கள். இந்நிலையில்,
தற்போது சினிமாவில் பிசியான நடிகையாகிவிட்ட
நயன்தாரா தொடர்ந்து கதாநாயகிக்கு முக்கியத்துவம்
கொடுக்கும் படங்களில் நடிக்கத் தொடங்கியிருக்கிறார்.

அப்படி நயன்தாரா நடித்து வருடம் படங்களில் ஒன்றுதான்
‘கொலையுதிர்காலம்’. இப்படத்தை ‘பில்லா-2’,
‘உன்னைப்போல் ஒருவன்’ ஆகிய படங்களை இயக்கிய
சக்ரி டோலட்டி இயக்குகிறார்.

இப்படத்தின் படப்பிடிப்பு விறுவிறுப்பாக சென்று
கொண்டிருக்கும் நிலையில், இப்படத்தை இந்தியிலும்
ரீமேக் செய்யவிருக்கின்றனர்.

இந்தி ரீமேக்கை சக்ரி டோலட்டியே இயக்கவிருக்கிறார்.
ஆனால், தமிழில் நயன்தாரா நடித்த வேடத்தில் தமன்னா
நடிக்க ஒப்பந்தமாகியுள்ளதாக கூறப்படுகிறது.

மேலும், அப்படத்தின் வில்லனாக பிரபுதேவா நடிக்கப்
போவதாகவும் செய்திகள் வெளியானது. பிரபுதேவா
சமீபகாலமாக இயக்கும் பணியை விட்டுவிட்டு நடிகர்,
தயாரிப்பாள் என களறமிங்கியுள்ளார் என்பது
குறிப்பிடத்தக்கது.

———————————–
மாலைமலர்

சிரித்த முகத்துடன் நீங்கள் பார்க்கக்கூடிய எமோஷனல் படம்!

-மை. பாரதிராஜா

அடி வாடி திமிரா..
புலி ஓட்டும் முறமா..
நம்ம வாழ்க்கை பயமா?
வரமா? ஒரு கோடி சிறகா
நம்ம பார்வை விரிஞ்சா
இந்த பூமி தகுமா… தகுமா?

– ஜிப்ரானின் இசைக்கு உமாதேவியின் வரிகளில் ஓபனிங் பாடல் பரபரக்கிறது. ஆக்ராவின் சாலைகளில் ஜோதிகா ஜம்மென புல்லட் ஓட்டிக்கொண்டிருக்க.. ஜோதிகாவுக்கு பின்னால் கம்பீரமாக பயணிக்கிறார் ஊர்வசி. ‘குற்றம் கடிதல்’ அடுத்து பிரம்மா இயக்கி வரும் ‘மகளிர் மட்டும்’ படத்தில்தான் இப்படி ஒரு காட்சி.

‘‘‘மகளிர் மட்டும்’காக திண்டிவனம் பக்கம் ஷூட்டிங். ஒரு ஸ்கூல் டீச்சர். அவங்களுக்கு ஐம்பது வயசு இருக்கும். ‘‘குற்றம் கடிதல்’ படம் இல்ல தம்பி… என் வாழ்க்கைல நடந்த விஷயம்…’னு தேம்பித் தேம்பி அழுதாங்க. போன வாரம் எங்க ஆபீஸுக்கு நூறு ரூபாய் மணியார்டர் வந்திருந்தது. ‘‘குற்றம் கடிதல்’ திருட்டு டிவிடில பார்த்தேன். ஒரு நல்ல படத்தை அப்படி பார்த்தது உறுத்தலா இருந்துச்சு.

அதான் அதுக்கான பணத்தை அனுப்பினேன்’னு எழுதியிருந்தார் முகம் தெரியாத ஒருத்தர். நேஷனல் அவார்டு கிடைச்சதும் ரஜினி சார்கிட்ட இருந்துதான் முதல் வாழ்த்து வந்துச்சு. இப்படி மறக்கமுடியாத தருணங்கள் நிறைய இருக்கு. அது ஒரு intensive film. ஆனா, ‘மகளிர் மட்டும்’ எமோஷனலானது. அதிலும் ஒவ்வொரு ஃபிரேம்லேயும் நீங்க சிரிச்ச முகமாகவே பார்த்து ரசிப்பீங்க…’’ திருப்தியாக பேசுகிறார் பிரம்மா.

சூர்யா தயாரிப்பு. ஜோதிகா லீட் ரோல். காம்பினேஷனே களைகட்டுதே..?
‘மகளிர் மட்டும்’ கதை ரெடியானதும் ஜோதிகாவுக்கு பொருத்தமான கதையா இருந்துச்சு. அவங்ககிட்ட கதை சொல்லும் போது, சில இடங்கள்ல சீரியஸா கேட்டாங்க. நிறைய இடங்கள்ல சிரிச்சாங்க. அப்பவே எனக்கு கான்பிடன்ட் வந்திடுச்சு. அடுத்து சூர்யா சார்கிட்ட கதையை சொன்னேன். அவருக்கும் பிடிச்சிருந்தது. ‘2டி’லேயே பண்ணிடலாம்’னு உற்சாகப்படுத்தினார்.

ஜோதிகா, ஊர்வசி, சரண்யா பொன்வண்ணன்னு பெண்களுக்கு முக்கியத்துவம் உள்ள கதை. ‘மகளிர்மட்டும்’ டைட்டில் கிடைச்சா ரீச் அதிகமா இருக்கும்னு நினைச்சேன். சூர்யா சார் உடனே கமல் சார்கிட்ட பேசி, இந்த டைட்டிலை வாங்கிக் கொடுத்தார். இது ஒரு உண்மைச் சம்பவத்தை அடிப்படையாகக் கொண்டது. நாசர் சார், லிவிங்ஸ்டன், பாவல், கோகுல்நாத் தவிர நிறைய புதுமுகங்கள் இருக்காங்க.

ஷூட்டிங் தொடங்குறதுக்கு முன்னாடி நடிகர்களுக்கு ரிகர்சல் வைக்கிறது உங்க ஸ்டைல் ஆச்சே..?
முதல் படத்துல ரிகர்சல் சாத்தியமாச்சு. இந்தப் படத்துலேயே ஒரு மாசம் workshop வச்சிருந்தேன். இந்த மாதிரி பயிற்சிப் பட்டறை வைக்கறது அவங்களுக்கு நடிப்பு சொல்லிக் கொடுக்கறதுக்கு இல்ல. இது ஆக்டிங் ப்ராக்டீஸ் கிடையாது. கேரக்டரோட ஆழத்தை உணர்ந்து உள்வாங்கிக்கற முயற்சியாகத்தான் இந்த ஒர்க்‌ஷாப். ஜோதிகா, ஊர்வசி, சரண்யா எல்லாருமே பிஸியானவங்க. அதனால அவங்களத் தவிர மத்தவங்க பயிற்சி எடுத்தாங்க. ஊர்வசியும், நாசரும் ஏற்கனவே பழைய ‘மகளிர் மட்டும்’ல நடிச்சிருந்தவங்க. மறுபடியும் அதே டைட்டில்ல நடிச்சிருக்கறது சந்தோஷமா இருக்குதுனு சொன்னாங்க.

பானுப்ரியாவுக்கு இந்தப்படம் செகண்ட் இன்னிங்ஸ்தானே?
ஆமா. இந்தப் படத்துல அவங்களை நடிக்க வைக்கலாம்னு தேடினா வெளிநாடு போயிருந்தாங்க. அவங்க வர்ற வரை காத்திருந்தோம். அதே மாதிரி ஊர்வசி மேம் ஒரு தகவல் களஞ்சியம். அவ்வளவு விஷயங்கள் தெரிஞ்சு வச்சிருக்காங்க. ஆக்ரா ரோட்டுல ஜோதிகா புல்லட் ஓட்டுற சீன்ல பைக்ல பின்னாடி உட்காரச் சொன்னதும் ஊர்வசி மேம் மிரண்டுட்டாங்க. ‘எனக்கும் பைக்குக்கும் ராசியே கிடையாது’னு தயங்கினாங்க. யாருக்கும் தெரியாமல் கேமரா வச்சு, லைவ் ஷூட் பண்ணினோம். செட்டுல சரண்யா மேம்ல இருந்து எல்லாருமே ஒண்ணு சேர்ந்தா பிக்னிக் மாதிரி பேசி, சிரிச்சு, ஒண்ணா உட்கார்ந்து சாப்பிட்டு…னு செம ஃப்ரெண்ட்லியா பழகினாங்க.

தயாரிப்பாளர் சூர்யா என்ன சொல்றார்?
படத்தோட பூஜை அன்னிக்கு அவரால வர முடியல. முதல் நாள் ஷூட்டிங் அன்னிக்கு ‘அழகான படத்தை எடுத்துக் கொடுங்க. வாழ்த்துகள்’னு மெசேஜ் அனுப்பியிருந்தார். அதன்பிறகு நிறைய முறை ஸ்பாட்டுக்கு வருவார். ‘எந்த ஆர்ட்டிஸ்ட் தேவைனாலும் சொல்லுங்க’னு கேட்பார். ஒரே ஒரு படம் பண்ணின இயக்குநர்னு நினைக்காம எனக்கு முழு சுதந்திரம் கொடுத்தார்.

என்னோட குறும்படங்கள்ல இருந்து கூடவே இருக்கும் எஸ்.மணிகண்டன், ‘குற்றம் கடிதலு’க்கு அடுத்து இதற்கும் ஒளிப்பதிவு பண்ணியிருக்கார். இடையே தெலுங்கில் ரெண்டு படங்கள் அவர் பண்ணிட்டார். படத்துக்கு இசை ஜிப்ரான். ‘வாகை சூடவா’ல இருந்து அவரோட இசையை கவனிச்சிட்டிருக்கேன். இதுல அவர் நாலு பாடல்கள், ஒரு தீம் மியூசிக், ஒரு ஃபோக்னு வெரைட்டி கொடுத்திருக்கார்.

படத்துல ஜோதிகா யார்?
பிரபாவதி. ஆவணப்பட இயக்குநரா நடிச்சிருக்காங்க. வழக்கமான ஜோதிகால இருந்து கொஞ்சம் மாறியிருக்கற ஜோதிகாவா இருக்கணும். ரெகுலர் ஆடியன்ஸ் விரும்பற ஜோதிகாவாகவும் தெரியணும்னு கேரக்டரை உருவாக்கினேன். புல்லட் தவிர, வேற ஒரு வாகனமும் அவங்க ட்ரைவ் பண்ணுவாங்க. நிறைய விஷயங்கள் கத்துக்கிட்டு வந்தாங்க.

அவங்க பஞ்சாபி பெண். ஆனா, தமிழை உணர்ந்து பேசி நடிக்கறாங்க. தங்லீஷ்லதான் ஸ்கிரிப்ட் கொடுத்திருந்தேன். டயலாக்கைக் கூட முதல்நாளே வாங்கிட்டுபோய் மறுநாள் வரும்போது மனப்பாடமா பேசினாங்க. ‘மாயாவி’ல சொந்தக்குரல்ல டப்பிங் பேசியிருப்பாங்க. அதுக்குப் பிறகு இதுலதான் அவங்களே டப்பிங் பேசியிருக்காங்க. காலையில ஆறு மணிக்கு ஷூட்டிங்னா ஷார்ப்பா அந்த டைமுக்கு செட்ல இருப்பாங்க. டெடிகேட்டட் ஆர்ட்டிஸ்ட்.

Behind the scenes

* சட்டீஸ்கர், ஆக்ரா, உத்தரப்பிரதேசம், திண்டிவனம் ஆகிய இடங்களில் ஷூட்டிங் நடந்திருக்கிறது. படத்தின் லொகேஷன் தேடுதலுக்காக 2 ஆயிரம் கிலோமீட்டர் சுற்றி வந்திருக்கிறார்கள்.
* ‘கபாலி’ உமாதேவி, விவேக் தவிர தாமரையும், இயக்குநர் பிரம்மாவும் பாடல்கள் எழுதியுள்ளனர்.
* கேரளா படப்பிடிப்பில் இரண்டு மலைகளுக்கிடையே கயிற்றில் தொங்கிய படி ஜோதிகாவும், ஊர்வசியும் கடப்பது போல் காட்சி. டூப் போடாமல் இருவரும் நிஜமாகவே ரிஸ்க் எடுத்து கடந்துள்ளனர்.

-நன்றி – குங்குமம்

 

« Older entries Newer entries »