தினமும் வழிபாடு செய்

*’எனக்கு எல்லாம் நீயே; உன்னையே எனக்கு கொடு’
என கடவுளிடம் தினமும் வழிபாடு செய்யுங்கள்.

*கடவுளுடன் பேசுவது வழிபாடு. அவர் பேசுவதைக் கேட்பது
தியானம்.

*ஈடுபடும் செயல் அனைத்தும் கடவுளுக்குரிய அர்ச்சனையாக
அமைய வேண்டும்.

*கலியுகத்தில் கடவுளின் திருநாமத்தை சொல்வதை விட
சிறந்த வழிபாடு வேறில்லை.

*யாரையும் தவறாக நினைக்க கூடாது. மற்றவர்களிடம் உள்ள
நல்லதை மட்டுமே காண வேண்டும்.

—————————————–
– சாய்பாபா

Advertisements

செங்கமலப் பூவில் தேனுண்ணும் வண்டே போல்..

பெரியாழ்வார் திருமொழி – முதற்பத்து
எட்டாம் திருமொழி – பொன்னியல்
(அச்சோப்பருவம்- அணைத்துக்கொள்ள அழைத்தல்)
கலித்தாழிசை
பாடல் – 2

 

செங்கம லப்பூவில் தேனுண்ணும் வண்டேபோல்*
பங்கிகள் வந்துஉன் பவளவாய் மொய்ப்ப*
சங்குவில் வாள்தண்டு சக்கர மேந்திய*
அங்கைக ளாலேவந்து அச்சோவச்சோ ஆரத்தழுவா வந்து அச்சோவச்சோ.


பதவுரை:

மிக மிக எளிமையான பாடல்! இந்தப் பாடலை தமிழ் மொழி அறிந்த அனைவராலும் எளிமையாகப் புரிந்து கொள்ள முடியும். தனியாக விளக்கம் என்று எதுவும் தேவைப்படாத ஒரு பாடல்.

செங்கமலப் பூவில் தேனுண்ணும் வண்டே போல்- செங்கமலப் பூ, அதாவது செந்தாமரை மலர். சிவந்த தாமரை மலரில் தேனுண்ணும் வண்டுகளைப் போல். (செந்தாமரை மலர் மேல் வண்டு மொய்த்தல்)

பங்கிகள் வந்து உன் பவளவாய் மொய்ப்ப – பங்கி – கூந்தல்; உன் பவளச் செவ்வாய் மேல் கருங்கூந்தல் காற்றில் அலைபாய்ந்து வந்து படர.

சங்கு வில் வாள் தண்டு சக்கரம் ஏந்திய அங்கைகளாலே வந்து அச்சோ அச்சோ ஆரத்தழுவா வந்து அச்சோ அச்சோ – அங்கை – உள்ளங்கை – திருச்சங்கு, வில், வாள், தண்டு மற்றும் திருச்சக்கரம் என்னும் பஞ்சாயுதங்களையும் உள்ளங்கைகளில் ஏந்தியிருக்கும் எம்பிரானே அச்சோவச்சோ! என் மனம் கரைந்து, என் ஆன்மா இளகும்படி ஆரத்தழுவாய்!

குட்டிக்கண்ணன் மழலை நடையில் வேகமாக ஓடி வருகையில், காற்றில் அலைபாயும் கூந்தல், அவனின் இதழ்மேல் ஒட்டிக்கொள்ளும். மழலைக்குழந்தைகளின் உதடு எப்பவும் காய்ந்திருக்காது. மென்மையும், ஈரத்தன்மையும், பொலிவும் எப்பொழுதும் இருக்கும். அந்த ஈரத்தில் ஒட்டிக்கொள்ளும் மென்கூந்தலை, செந்தாமரை மலரில் தேன் உண்ணும் வண்டுகளோடு ஒப்புமைப்படுத்தியுள்ளார் பெரியாழ்வார்.

பொருளுரை:

எம்பெருமானே! செந்தாமரை மலரில் தேன் உண்ணும் வண்டுகளைப் போல், உன் செவ்விதழ் மேல் கருங்கூந்தல் படர ஓடி வந்து, திருச்சங்கு, வில், வாள், தண்டு, திருச்சக்கரம் என்னும் ஐந்து ஆயுதங்களை ஏந்திய உள்ளங்கைகளாலே என் ஆன்மாவின் பாவங்களை கழுவுமாறு என்னை ஆரத்தழுவுவாயாக!

நன்றி-தமிழ்

-http://aazhvarmozhi.blogspot.in/2013/07/1-8-2.html

ஆருடம் ஒன்று சொல்லடி…

 

வரிகள் : ஊத்துக்காடு வெங்கடசுப்பையர்
ராகம் : கல்யாணி
தாளம் : ஆதி

ஆருடம் ஒன்று சொல்லடி – என்
அந்தரங்க சிந்தையுடன் வந்து உறவாடின
நந்த முகுந்தன் எந்த நாளும் அகலாதிருக்க ( )

பாரோடு விண்ணாகப் பரந்திருந்தானே
பச்சைப் பிள்ளைத்தனம் போகவில்லையே மானே
ஆரோடு சொல்வேனோ அந்தரங்கம் தானே
அந்தரங்கம் ஆனாலும் சிந்தை நாணம்தானே ( )

அலைந்து வெண்ணை திருட அதிலென்ன இருக்கோ
அத்தைமகன் மேலேயும் இவனுக்கென்ன வெறுப்போ
ஒரு பிடி அவலுக்கு உலகம்தான் கணக்கோ
உள்ளதைச் சொல்லப்போனால் உனக்கென்ன சிரிப்போ.. ( )

அச்சம் இல்லாமல் அரவமேலே நின்றாடுவான்
ஆரும் அழைக்க வந்தால் அவர் பின்னே ஓடுவான்
மிச்சம் மீதி இல்லாது வெண்ணை களவாடுவான்
வேண்டாமே கண்ணா என்றால் வேணவழக்காடுவான்..( )

-http://vishnuourlord.blogspot.in/

 

குழலூதி மனமெல்லாம் கொள்ளை கொண்ட …

வரிகள் : ஊத்துக்காடு வேங்கட சுப்பையர்
ராகம் : காம்போதி
தாளம் : ஆதி
————————————–

குழலூதி மனமெல்லாம் கொள்ளை கொண்ட
பின்னும்
குறையேதும் எனக்கேதடீ – ஒரு சிறு
குறையேதும் எனக்கேதடீ (குழலூதி)

அழகான மயில் ஆடவும் – மிக
அழகான மயில் ஆடவும் – காற்றில்
அசைந்தாடும் கொடி போலவும்

அகமகிழ்ந்திலகும் நிலவொளி தனிலே
தனைமறந்து புள்ளினம் கூட
அசைந்தாடி மிக இசைந்தோடிவரும்
நலம் காண ஒரு மனம் நாட
தகுமிக எனஒரு பதம்பாட தகிடதமிதி
என நடம் ஆட
கன்று பசுவினொடு நின்று புடைசூழ,
என்றும் மலருமுக..இறைவன் கனிவோடு
(குழலூதி)

மகர முண்டலம் ஆடவும் – அதற்கேற்ப
மகுடம் ஒளி வீசவும்
மிகவும் எழிலாகவும் – காற்றில்
மிளிரும் துகில் ஆடவும்
அகமகிழ்ந்திலகும் நிலவொளி தனிலே
தனைமறந்து புள்ளினம் கூட
அசைந்தாடி மிக இசைந்தோடிவரும்
நலம் காண ஒரு மனம் நாட
தகுமிக எனஒரு பதம்பாட தகிடதமிதி
என நடம் ஆட
கன்று பசுவினொடு நின்று புடைசூழ,
என்றும் மலருமுக..இறைவன் கனிவோடு
(குழலூதி)

———————————–

 

திருப்பதி ஏழுமலையான் கோயிலில் ஆஸ்தான வித்வான்களாக முஸ்லிம் சகோதரர்கள்

01ChGunMuslim Bros.jpg

உலக பிரசித்தி பெற்ற திருப்பதி ஏழுமலையான் கோயிலில் கடந்த
21 ஆண்டுகளாக ஸ்ரீரங்கத்தை சேர்ந்த முஸ்லிம் சகோதர்கள்,
ஆஸ்தான நாதஸ்வர வித்வான்களாக தங்களது கலைப்பணியை
ஏழுமலையானுக்கு அர்ப்பணித்து வருகின்றனர்.

ஆந்திர மாநிலம் பிரகாசம் மாவட்டத்தை பூர்வீகமாக கொண்டவர்கள்
காசிம், பாபு சகோதர்கள். புகழ்பெற்ற நாதஸ்வர வித்வான்
ஷேக் சின்ன மவுலானாவின் மகன்கள் இவர்கள்.

சின்ன மவுலானா மத்திய அரசின் ‘பத்மஸ்ரீ’ விருது பெற்றவராவார்.
இவரை தங்கள் குருவாக ஏற்று கடந்த 21 ஆண்டுகளாக திருமலை
திருப்பதி தேவஸ்தான ஆஸ்தான வித்வான்களாக காசிம், பாபு
சகோதர்கள் தொண்டு செய்து வருகின்றனர்.

தற்போது நடைபெற்று வரும் திருப்பதி பிரம்மோற்சவ விழாவிலும்
இவர்கள் பங்கேற்றுள்ளனர்.

இதுகுறித்து ‘தி இந்து’ விடம் காசிம், பாபு சகோதரர்கள் கூறியதாவது:

எங்களது முன்னோர் கடந்த 300 ஆண்டுகளாக நாதஸ்வர கலைஞர்களாக
இருந்துள்ளனர். எங்களது தலைமுறை 9-வது தலைமுறையாகும்.
எங்களது தந்தையிடம் நாங்கள் 7 வயதில் நாதஸ்வரம் கற்கத்
தொடங்கினோம். 17-வது வயதில் தனியாக வாசிக்கத் தொடங்கினோம்.

பின்னர் நம் நாட்டில் மட்டுமின்றி, 17 வெளி நாடுகளிலும் பல
கச்சேரிகளை செய்துள்ளோம். ஆனால் அதிலெல்லாம் கிடைக்காத
மன நிம்மதி, திருப்பதி ஏழுமலையானின் சேவையில் கிடைக்கிறது.

கலைஞனுக்கு ஜாதி, மதம், பேதமில்லை. எங்களது கலைக்கு மதிப்பு
கொடுத்து திருமலை திருப்பதி தேவஸ்தானம் கடந்த 1996-ம் ஆண்டு
எங்களை ஆஸ்தான வித்வான்களாக அறிவித்தது.

இதையடுத்து இன்று வரை ஒவ்வொரு ஆண்டும் பிரம்மோற்சவம்,
ரத சப்தமி, ஆனி ஆஸ்தானம், தெலுங்கு வருடப்பிறப்பு, திருச்சானூர்
பத்மாவதி தாயார் பிரம்மோற்சவம் போன்ற விசேஷ நாட்களுக்கு
நாதஸ்வரம் வாசிக்கிறோம்.

மேலும், அமெரிக்காவில் சிகாகோ உள்ளிட்ட பல இடங்களில்
நடைபெறும் திருப்பதி தேவஸ்தானத்தின் திருக்கல்யாண
உற்சவங்களிலும் நாங்கள் பங்கேற்று வருகிறோம். திருப்பதி
தேவஸ்தானம் மட்டுமின்றி, ஸ்ரீரங்கம் ரங்கநாத பெருமாள் கோயில்,
சிருங்கேரி மடம், காஞ்சி மடம் போன்றவற்றிலும் நாங்கள் ஆஸ்தான
வித்வான்களாக தொண்டு செய்து வருகிறோம்.

நாங்கள் இப்போது ஸ்ரீரங்கத்தில் வசித்து வருகிறோம். எங்களது
திறமையை அறிந்து தமிழக அரசு கலைமாமணி விருது வழங்கி
கவுரவித்தது. இதை எங்களின் பூர்வ ஜென்ம பலனாக கருதுகிறோம்.

ஸ்ரீரங்கத்தில் எங்களது தந்தை பெயரிலான
‘டாக்டர் சின்ன மவுலான நினைவு அறக்கட்டளை’ சார்பில் கலை
ஆர்வமுள்ள ஏழை சிறுவர், சிறுமியருக்கு இலவசமாக நாதஸ்வரம்
கற்றுத் தருகிறோம்.

மேலும் நாதஸ்வரத்தையும் இலவசமாக வழங்குகிறோம்.
நாதஸ்வரம் என்பது மங்கல நிகழ்ச்சிகளுக்கான வாத்தியம்.
இது நமது கலாச்சாரத்தின் அடையாளம். இது அழிந்து விடாமல்
காப்பது நமது கடமையாகும். இவ்வாறு காசிம், பாபு சகோதரர்கள்
கூறினர்.

—————————
தி இந்து

Keywords
திருப்பதி ஏழுமலையான் கோயில் ஆஸ்தான வித்வான்க

திருப்பதியில் பிரசாதமாக லட்டு கொடுப்பது ஏன்?

திருப்பதி ஏழுமலையான் கோயிலில் லட்டு பிரசாதமாக கொடுக்கப்படுவது ஏன் தெரியுமா?

கி.பி.830ஆம் ஆண்டில்தான் முதல் முதலாக பல்லவர் ஆட்சியில்
ஏழுமலையான் கோயிலில் பக்தர்களுக்கு பிரசாதம்
விநியோகிக்கும் திட்டம் தொடங்கப்பட்டதாகக் கூறப்படுகிறது.

அந்த காலத்தில் பக்தர்கள் ஏழுமலையானை தரிசிக்க மலையேறி
செல்ல பல நாட்கள் ஆகும். தரித்த பின்பும் சில நாட்கள் மலையில்
தங்கி ஓய்வு எடுத்த பிறகு ஊர் திரும்புவது வழக்கம்.

அவர்கள் திரும்பி வீடுக்குச் செல்லும் வரை தேவையான உணவு
அவர்களுக்கு கோயில் பிரசாதமாக வழங்கப்பட்டது.

இதனால், முதலில் ‘திருப்பொங்கம்’ என்ற பெயரில் பிரசாதம்
வழங்கப்பட்டது. பின்னால், கி.பி.1445ஆம் ஆண்டு முதல் ‘சுய்யம்’
என்ற இனிப்பு பிரசாதமாகக் கொடுக்கப்பட்டது.

1455ஆம் ஆண்டு அப்பம் கொடுக்கத் தொடங்கினார்கள். 1460ஆம்
ஆண்டில் அது வடையாக மாறியது. 1468ஆம் ஆண்டு முதல் வடைக்கு
பதில் அதிரசம் தரப்பட்டது.
1547ஆம் ஆண்டு மனோஹரம் எனப்படும் இனிப்பு வழங்கப்பட்டது.

1803ஆம் ஆண்டு மதராஸ் மாகாணம் அமல் படுத்திய பிரசாத
விநியோக முறையில் பூந்தி பிரசாதமாக விற்பனையானது.
1940ஆம் ஆண்டு முதல் பூந்திக்கு பதில் லட்டு விற்பனை அமலானது.

 

ஆரம்பத்தில் திருப்பதி ஏழுமலையான் கோயில் லட்டு ஒன்று எட்டு
அணாவிற்கு விற்கப்பட்டது. தற்போது ஒரு லட்டு விலை
ரூ.25 ஆக உள்ளது. இதன் பெயர் ‘ப்ரோக்தம் லட்டு’. இது தவிர,
கல்யாண உற்சவ லட்டு, கல்யாண உற்சவத்தில் பங்கேற்கும்
பக்தர்களுக்கு மட்டும் வழங்கப்படும்.
இது ஒரு லட்டு ரூ.100க்கு விற்கப்படும்.

——————————-
நன்றி- தமிழ் சமயம்


விளக்கு எரிந்த வீடு வீணாய் போகாது

வீட்டில் விளக்கேற்றுவதில் இவ்வளவு விஷயம் இருக்கா? இருக்கே!

“விளக்கு எரிந்த வீடு வீணாய் போகாது ” என்று ஒரு பழமொழி உள்ளது.
நாம் வீட்டிலும், கோவிலிலும் ஏன் விளக்கேற்றுகிறோம் தெரியுமா?

தீபத்தின் சுடருக்கு தன்னை சுற்றி உள்ள தேவையற்ற கதிர்களை(நெகடிவ் எனர்ஜி) ஈர்க்கும் சக்தி உண்டு.

அவ்வாறு ஈர்க்கும்போது நம்மை சுற்றி பாசிடிவ் எனர்ஜி அதிகரிக்கும்.
நம் சுற்றுப்புறம் தெளிவாகவும் பலத்தோடும் காணப்படும்.

இரண்டு நாள் வீட்டில் விளக்கேற்றாமல் இருந்தால் வீடே
மயானம் போல் தோன்றும்.

எல்லோருமே சோர்வாக இருப்பார்கள்.
இதுவே விளக்கேற்றுவதன் தத்துவம்.

நம் உடலில் இருக்கும் ஏழு சக்கரங்களில் மூலாதாரமும், சுவாதிஷ்டானமும் நல்லெண்ணெய் விளக்கு ஏற்றுவதால் தூய்மையடைகிறது.

அதேபோல மணிபூரகம், அனாஹதம் இரண்டும் நெய்விளக்கு ஏற்ற தூய்மை அடைந்து நற்பலன்களை அடைகிறது.

நம் உடலில் இருக்கும் நாடிகளில் சூரியநாடி, சந்திர நாடி, சுஷம்னா நாடி ஆகியவை மிக முக்கியமாக கருதப்படுகிறது.

சூரியநாடி, நல்ல சக்தியையும் வெப்பத்தையும் தருகிறது. சந்திரநாடி குளுமையை தருகிறது.

சுஷம்னா நாடி அந்த பரம்பொருளுடன் சம்பந்தப்பட்டு ஆன்மிக பாதையை வகுக்கிறது.

நல்லெண்ணெய் விளக்கு ஏற்ற சூரியநாடி சுறுசுறுப்படைகிறது.

நெய் விளக்கு சுஷம்னா நாடியை தூண்டிவிட உதவுகிறது.

பொதுவாக நெய்தீபம் சகலவித சுகங்களையும் வீட்டிற்கு நலன்களையும் தருகிறது.

திருவிளக்கு எப்போது வேண்டுமானாலும் ஏற்றலாம்.
இதற்கு தடையேதும் இல்லை.

ஆனால் பொதுவாக மாலை 6.30க்கு ஏற்றுவதே நமது மரபு.
இதை கருக்கல் நேரம் என்பர்.

சூரியன் மறைந்ததும் சில விஷ சக்திகள் சுற்றுசூழலில் பரவி வீட்டிற்குள்ளும் வர வாய்பிருக்கிறது.

ஒளியின் முன் அந்த விஷ சக்திகள் அடிபட்டுபோகும்.
எனவே அந்நேரத்தில் விளக்கேற்றுகின்றோம் என்பது அறிவியல் உண்மை.

ஒரு நாளிதழில் வெளிவந்த நிகழ்வு இது.
அமெரிக்காவில் இருக்கும் தன் மகனின் வீட்டுக்கு சென்றிருக்கும் ஒரு தாய்

மாலையில் தன் மகனும் மருமகளும் தாமதமாக வீட்டுக்கு வருவதை பார்க்கின்றார். இருவரும் வேலைக்கு செல்பவர்கள்.

ஒருநாள் மகன் முன்னதாகவும் ஒருநாள் மருமகள் முன்னதாகவும் வருவார்கள்.

ஒருநாள் மகனை அழைத்து தாமதமாக வரும் காரணம் கேட்க ”உன்க்கு இதெல்லாம் புரியாதம்மா.

எங்கள் இருவருக்கும் பயங்கர ஸ்ட்ரெஸ்!!!! இருவரும் கவுன்சிலிங் போய்வருகிறோம்.

ஒருமணி நேரத்துக்கு அந்த டாக்டருக்கு கொடுக்கும் தொகை அதிகம்.

மிக சிறந்த டாக்டர் அவரது சிகிச்சையில் எல்லாம் சரியாகிவிடும் என்று கூறினான்.

அதற்கு அந்த தாய், நாளை அந்த டாக்டரை பார்க்க போக வேண்டாம் என்றும் சீக்கிரம் வீட்டுக்கு வரவேண்டும் என்று கூறினார்.

அடுத்த நாள் மாலை வீட்டுக்குள் நுழைந்த மகன், மருமகள் மூக்கை சுகந்த மனம் துளைக்கிறது.

இருவரையும் கைகால் கழுவி உடை மாற்றி பூஜை அறைக்கு வருமாறு தாய் கூறினர்.

அவர்களும் அவ்வாறு அங்கே செல்கின்றனர். மனம் வீசும் மலர்களின் வாசம்… அழகான தீப ஒளி நிறைந்த அந்த அறையில் சற்றுநேரம் அமரச்சொல்கிறார்.

இருவரும் தாமாகவே கண்மூடி அந்த சூழலின் இன்பத்தை அனுபவிக்கின்றனர்.

பின் கண் திறந்தபோது கவுன்சிலிங்கில் கிடைக்காத அமைதி கிடைத்ததாக சொல்ல தாயார் மகிழ்ந்தார்.

குறிப்பு:-

மெழுகுவர்த்தி எற்றக்கூடாது. இதன் புகை உடல் நலத்தை கெடுக்கும்.

ஆஸ்துமா, மார்புபுத்துநோய் இவைகளுக்கு மெழுகுவர்த்திதான் தாய்.

மண்ணெண்ணெய் விளக்கும் வேண்டாம்.

வீட்டில் பெண் குழந்தைகள் இருந்தால் அவர்களை தினசரி விளக்கேற்றும்படி கேட்டுக்கொள்ளவேண்டும்.

இப்படி செய்தால் அவர்களின் முகப்பொலிவு பன்மடங்கு கூடும்.

விளக்கேற்றிய வீடு வீண் போகாது. மூத்தோர் சொல் வார்த்தை அமிர்தம்.

அறிந்துணர்வோம் அறிவில் உயர்ந்துணர்வோம்!

வாழ்க வையகம்! வாழ்க வையகம்! வாழ்க வளமுடன்!

வாட்ஸ் அப் பகிர்வு

புஷ்கரம் என்றால் என்ன?

காவேரி புஷ்கரம் என்று கூறி நீராட வரும்படி கூறுகிறார்களே,,,
அதன் பின்னனி என்ன?
இந்தியாவில் மிக சிறப்பாக
கொண்டாடப்படுவது புஷ்கரம் திருவிழா,,,

,
அதற்கு ஒரு புராண கதை உண்டு,,,
நவக்கிரஹங்களில்
ஒருவரான குருபகவான் பிரம்மனை நோக்கி கடும் தவம்
செய்தார்.
அவரின் தவத்தை மெச்சிய பிரம்மன் தோன்றினார்.
குரு பகவானை நோக்கி “உனக்கு என்ன வேண்டும” என்று
கேட்டார்.

அதற்கு பதிலளித்த குருபகவான்,” எனக்கு தங்களுடைய புஷ்கரம்
தான் வேண்டும்” என்று கேட்டார்.
குரு பகவானின் விருப்பப்படியே
தன்னிடமுள்ள புஷ்கரத்தை அவருக்கு அளிக்க ஒப்புக் கொண்டார்
பிரம்மன்.
ஆனால் புஷ்கரம் பிரம்மனை விட்டுப் பிரிந்து குருவிடம் செல்ல
மறுத்தது.
இதனால் தர்ம சங்கடமான பிரம்மன் புஷ்கரத்திற்கும்
குரு பகவானுக்கும் இடையே ஒரு சமாதான உடன்படிக்கையை
ஏற்படுத்தினார்.

அதன்படி மேஷ ராசி முதல் மீன ராசி வரை 12 ராசிகளிலும்
அந்தந்த ராசிக்கு உகந்த புண்ணிய நதிகளில் புஷ்கரம் இருக்க
முடிவு செய்யப்பட்டது.
அதன்படி புஷ்கரம் மேஷம் ராசியில்
(கங்கை நதியிலும்), ரிஷபம் ராசியில் (நர்மதை நதியிலும்),
மிதுனம் ராசியில் (சரஸ்வதி நதியிலும்),
கடகம் ராசியில் (யமுனை நதியிலும்), சிம்மம் ராசியில்
(கோதாவரி நதியிலும்)
கன்னி ராசியின் போது
(கிருஷ்ணா நதியிலும்), துலாம் ராசியில் (காவேரி நதியில்)
விருச்சிக ராசியில் (தாமிரபரணி ஆற்றிலும்),
தனுசு ராசியின்
போது (சிந்து நதியிலும்), மகரம் ராசியில்
(துங்கபத்திரா ஆற்றிலும்), கும்பம் ராசியில் (பிரம்ம நதியிலும்),
மீனம் ராசியில் (பிரணீதா ஆற்றிலும்)
என குருபகவான்
எந்தெந்த ராசியில் பெயர்ச்சி செய்கிறாரோ அந்தந்த நேரத்தில்
புஷ்கரம் அங்கு தங்கி இருக்கும்.

அப்போது பிரம்மா, விஷ்ணு, சிவன், இந்திரன் முதலான முப்பது
முக்கோடி  தேவர்கள் எல்லாம் இந்நதியில் தங்கியிருப்பார்கள்
என்று உடன்படிக்கை செய்யப்பட்டது.
மேற்படி 12 நதிகளில்
குரு பகவான் பிரவேசிக்கும் நேரத்தில் 12 நாட்கள் தொடர்ந்து
நீராடுவது இந்தியாவில் உள்ள அனைத்து புனித நதிகளிலும்
நீராடுவதற்கு சமம் என்று கூறப்படுகிறது.

இம்முறை குரு பகவான் துலா ராசியில் வரும் செப்டம்பர்
12 அன்று  பிரவேசிப்பதால் காவேரி ஆற்றில் புஷ்கரம்
கொண்டாடப்படுகிறது.
மேலும் இம்முறை கொண்டாடப்படும்
காவேரி புஸ்கரம் என்பது 144 ஆண்டுகளுக்கு ஒரு முறை வரும்
காவேரி மகா புஸ்கரம் ஆகும்….

அதனால் வரும் செப்டம்பர் 12 அன்று தொடங்கி செப்டம்பர்
24 அன்று காவேரி ஆதி புஷ்காரமாகவும். செப்டம்பர் 25 அன்று
தொடங்கி அக்டோபர் 7 வரை  அந்திம புஸ்கரமாகவும்
கொண்டப்படுகிறது.
கர்நாடகா மற்றும் தமிழ்நாட்டில்
மாநிலத்தில் காவேரி புஷ்கரம் நடைபெறும் படித்துறைகள்
வருமாறு:–

தலைக்காவேரி (Talakaveri) –
(கர்நாடகா)
பாகமண்டலா ( Bhagamandala) –
(கர்நாடகா)
குஷால் நகர் (Kushalnagar) –
(கர்நாடகா)
ஸ்ரீரங்கப்பட்டினம் (Srirangapatna) –
(கர்நாடகா)
கிருஷ்ணராஜ் சாகர் அணை (Krishna Raj Sagar Dam) –
(கர்நாடகா)
மாண்டியா (Mandya) –
(கர்நாடகா)
ஷிவனசமுத்திரா (Shivanasamudra) –
(கர்நாடகா)
பன்னூர் (Bannur) –
(கர்நாடகா)
திருமாக்குடல் நரசிபுரா (Tirumakudal Narasipura) –
(கர்நாடகா)
தலக்காடு (Talakadu)
முடுகுத்தூர் (Mudukuthore) –
(கர்நாடகா)
கனகபுர் (Kanakapur) – (கர்நாடகா)
மேட்டூர் (Mettur) –
(தமிழ்நாடு)
பவானி (Bhavani) –
(தமிழ்நாடு)
பள்ளிப்பாளையம்- ஈரோடு (Pallipalayam-Erode) –
(தமிழ்நாடு)
கொடுமுடி (Kodumudi) –
(தமிழ்நாடு)
பரமத்தி வேலூர் (Paramati Velur)-
(தமிழ்நாடு)
ஸ்ரீரங்கம் -திருச்சிராப்பள்ளி (Srirangam Tiruchirappalli)-
தஞ்சாவூர் (Thanjavur)- (தமிழ்நாடு)
சுவாமிமலை (Swamimalai) –
(தமிழ்நாடு)
கும்பகோணம் (Kumbakonam)-
(தமிழ்நாடு)
மயிலாடுதுறை (Mayavaram) –
(தமிழ்நாடு)
பூம்புகார் (Poompuhar) –
(தமிழ்நாடு)
மேலுள்ள ஏதாவது இடங்களில் அல்லது காவேரி நதி
பிரயோகிக்கும் ஏதாவது ஒரு இடத்தில், காவேரி புஸ்கரம்
நடைபெறும்

இந்த புண்ணிய தினங்களில் (செப்டம்பர் 12 முதல் அக்டோபர் 7 வரை)
புனித நீராடி
எல்லாம் வல்ல இறைவனின் அருள் பெறுவோம்….

——————————-
வாட்ஸ் அப் பகிர்வு

_________________

பாரத யுத்தத்தில் கொல்லப்பட்ட அந்த மிகமிக நல்லவன் யார்?

 

பாரத யுத்தத்தில் கொல்லப்பட்ட அந்த மிகமிக நல்லவன் யார்?

பதினெட்டு நாட்கள் நடைபெற்றது குருட்க்ஷேத்திரப் போர்.

அந்தப் போரில் அது பதினான்காவது நாள்.அன்று அதிக எண்ணிக்கையில்
கௌரவர்களைக் கொன்று குவிப்போம் என்று உறுதி எடுத்துக் கொண்டபின் பாண்டவர்களின் கால்கள் பாசறையை விட்டு வெளிநடந்தன.அவர்களை வீரத் திலகமிட்டு வழியனுப்பி வைத்தாள் பாஞ்சாலி வெற்றி கிட்டியபின் தான் தலைமுடிவேன் என்ற சபதத்தின்படி, தலைவிரி கோலமாக இருந்த பாஞ்சாலி.

பாஞ்சாலி பார்த்துக் கொண்டிருக்கும் போதே வழிபடுகிற கண்ணன், அர்ச்சுனனின் தேரில் சாரதியாகத் தாவி ஏறி அமர்ந்தான். புல்லாங்குழல் வாசிக்கும் கண்ணனின் தாமரைப் பூங்கரங்கள், நல்லவர்களை வாழ வைத்து அல்லவர்களை அழிப்பதற்காக, தேர்க் குதிரைகளின் லகானைச் சடாரென்று கையில் பற்றிக் கொண்டன.

மற்றவர்களும் அவரவர் தேரில் அமர்ந்து போர்க்களம் நோக்கிப் புறப்பட்டார்கள். அந்தத் தருணத்தில்தான் பாஞ்சாலியிடமிருந்து அந்த விசித்திரமான வினா கண்ணனை நோக்கிப் புறப்பட்டது

‘‘கண்ணா! எல்லாம் தெரிந்த எம்பெருமானே! அனைத்துச் செயல்களையும் நடத்தும் ஆதிநாயகனே! இந்த யுத்தம் முழுவதையும் நீயே நடத்துகிறாய் என்பதை நான் அறிவேன். கொல்பவனும் நீ. கொல்லப்படுபவனும் நீ. வெல்பவனும் நீ. வெல்லப்படுபவனும் நீ. சொல். இன்று யார் யாரால்
கொல்லப்படுவார்கள்?”

(பாஞ்சாலியின் இந்தக் கேள்வியைக் கேட்டதும் பாண்டவர்கள் அனைவரும் கண்ணன் முகத்தை ஆவலோடு நோக்கினார்கள். இன்றைய போரின் நிலவரத்தை முன்கூட்டியே தெரிந்துகொள்ளும் ஆர்வம் அனைவர் விழிகளிலும்)

எதனாலும் எவ்விதத்திலும் பாதிக்கப்படாத கண்ணன், கலகலவென நகைத்தவாறே சொன்னான்: ‘‘பாஞ்சாலி! உனக்கு ஆனாலும் எல்லாவற்றையும் முன்கூட்டியே தெரிந்துகொள்ள வேண்டும் என்ற ஆவல். நல்லது. சொல்கிறேன். இன்று இரு தரப்பினராகப் பிரிந்து போரிடும் அனைவரிலும் மிகமிக நல்லவன் ஒருவன் கொல்லப்படுவான். இப்போது உலகில் வாழ்பவர்களில் அவனைவிட நல்லவர்கள் யாருமில்லை. அவன் இறக்கவிருப்பதை எண்ணி
என் மனம் இப்போதே வருந்துகிறது!”

இந்த விந்தையான பதிலால் கடும் அதிர்ச்சியடைந்த அர்ச்சுனன், பீமன், நகுலன், சகாதேவன் நால்வரும் தங்கள் அண்ணனான தர்மபுத்திரரைக் கவலையோடு பார்த்தார்கள். தர்மபுத்திரரை விட நல்லவர்கள் யாரிருக்க முடியும்? தர்மபுத்திரர்தான் இப்போது உலகில் வாழும் மிக நல்லவர் என்பது மக்கள் அனைவரும அறிந்த விஷயம் தானே? தர்மநெறி ஒருசிறிதும் தவறாத அவரது கதை இன்றோடு முடியப் போகிறதா? போர் என்று வந்துவிட்டால் இருதரப்பிலும் இழப்புகள் நேரும் என்பது எல்லோரும் அறிந்ததுதான். ஆனால், மூத்தவனையே போர் காவு கொள்ளப் போகிறதா? என்று…

பாஞ்சாலி கண்களில் நீர்வழிய யுதிஷ்டிரரைப் பார்த்தாள். இதயத்தைப் பிடித்துக்கொண்டு அப்படியே தரையில் அமர்ந்தாள். ஒவ்வொரு நாளும் பாண்டவர்கள் ஐவரும் போர் முடிந்து நல்லபடியாகத் திரும்ப வேண்டும் என்று கண்ணனைப் பிரார்த்தித்தவாறே பதற்றத்தோடு காத்திருப்பாளே இன்று
மாலை ஐவரும் திரும்புவார்களா, இல்லை நால்வர் மட்டும் தானா? என்று. கண்ணன் தன் பதிலால் ஏற்பட்ட பின்விளைவு எதையும் பொருட்படுத்தாத கண்ணன் அர்ச்சுனனின் தேரில் சாரதியாக போர்க்களம் நோக்கிப் பாய்ந்தது. யுதிஷ்டிரர் தேர் மற்றும் அனைவரின் தேர்களுக்கும் அடுத்து அடுத்து நகர்ந்தது…

போர்க்களத்தில் கையில் கதாயுதத்தோடு களத்தில் இறங்கிய பீமன் தன்னுடன் போர்த் தொடுக்க முன்வந்து நின்ற விகர்ணனைப் பார்த்துக் கடுமையாக எச்சரித்தார்

‘‘விகர்ணா! என்முன் வராதே! தள்ளிப் போ. நான் உன்னைக் கொல்வதற்காகக் களத்தில் இறங்கவில்லை. உன் இரு அண்ணன்களான துரியோதனன், துச்சாதனன் இருவரையும் வதம் செய்ய வந்திருக்கிறேன்.

அவர்கள் இருவரின் குருதியையும் கலந்து கூந்தலில் பூசிக் குளிப்பேன் எனச் சபதம் செய்திருக்கிறாள் பாஞ்சாலி. மேகம் போல் அடர்ந்த அவள் கூந்தல் முடியப்படாமல் இருப்பதை எத்தனை நாட்கள் நான் பார்த்துக் கொண்டிருப்பது! இன்று என் கையில் உள்ள கதையால், உன் அண்ணன்கள் இருவரின் கதை முடியவேண்டும். பாஞ்சாலி தன் கூந்தலை முடியவேண்டும். குறுக்கே வராதே! வழிவிடு!”

பீமனின் வீராவேசப் பேச்சைக் கேட்டு விகர்ணன் கடகடவென நகைத்தார் ‘‘ஏன் பீமா? என்னை வென்றுவிட்டு அவர்களை வெல்ல இயலாதா?

என்னை வெல்ல முடியாதென்ற பயமா?” என்றார்…

“பயமா? எனக்கா? அதுவும் உன்னைப் பார்த்தா? நல்ல வேடிக்கை. அச்சத்தால் அல்ல, உன்மேல் கொண்ட அன்பால் உன்னைக் கொல்ல என் கதாயுதம் விரும்பவில்லை நான் உன்னைக் கொல்ல முயன்றாலும் கூட என் கதாயுதம் என்னைத் தடுத்துவிடுமோ எனத்தான் அஞ்சுகிறேன். அன்று நீ நடந்துகொண்ட முறையை என்னோடு என் கதாயுதமும் அல்லவா பார்த்துக் கொண்டிருந்தது? என்னைப் போலவே அதற்கும் உன்மேல் அன்பும் மரியாதையும் உண்டு. தப்பிப் பிழைத்துப் போ” என்றார் பீமன்…

விகர்ணன் மீண்டும் நகைத்தார் ‘‘பீமா! என்று என்ன நடந்தது? எதைப் பற்றிப் பேசுகிறாய் நீ? உன் கதாயுதம் என்மேல் அன்பு செலுத்த வேண்டிய அவசியம் என்ன?” என்றார்.

“விகர்ணா மீண்டும் மீண்டும் சொல்கிறேன். வீண் வாதத்தில் இறங்காதே! கௌரவர்கள் நூறு பேரில் நீ மட்டும் தப்பிப் பிறந்தவன். அன்று கௌரவர் சபையில் பாஞ்சாலியை உன் அண்ணன் துச்சாதனன் துகிலுரிய எத்தனித்தானே, அப்போது மெய்ஞ்ஞானியான பீஷ்மர் கூட வாய்மூடி மௌனியாகத்தானே இருந்தார்?

அதர்மம் தலைவிரித்தாடிய அந்த சந்தர்ப்பத்தில் தர்மத்தின் பக்கம் நின்று குரல்கொடுத்தவன் நீ மட்டும்தான். ‘அநியாயம் நடக்கிறது, நிறுத்துங்கள்‘ என்று அறைகூவியவன் நீ ஒருவன்தான். கண்ணன் மட்டும் பாஞ்சாலிக்கு அருள் புரியாதிருந்தால் அன்று அவள் நிலை என்னவாகி இருக்கும்?

பெண்ணை மானபங்கம் செய்ய முயல்வது கண்டு பதைபதைத்த உள்ளம் உன் உள்ளம். நாங்கள் ஐவரும் கையாலாகாதவர்களாக இருந்தோம்.

பாஞ்சாலியின் பொருட்டாக நீ குரல்கொடுத்தால் அது உன் அண்ணன் துரியோதனனுக்கு உகப்பாக இராது என்பதையும் நீ யோசிக்கவில்லை.

அறத்தின் பக்கமே நின்றது உன் மனம். ஒரு பெண்ணுக்கு நேரும் அவமானம் கண்டு துடித்தது உன் நெஞ்சம். அந்த உயர்ந்த நெஞ்சை என் கதாயுதம் பிளப்பதை நான் விரும்பவில்லை. தயவுசெய்து தள்ளிப்போ அல்லது இன்னோர் யோசனை சொல்கிறேன். அதைக் கேள்!”

“அதென்னப்பா இன்னோர் யோசனை? அதையும் தான் சொல்லேன் கேட்போம்” என்றார் விகர்ணன்.

“நீ எங்களுடன் சேர்ந்துவிடு. பாண்டவர்கள் உன்னையும் சேர்த்து ஆறுபேராக இருப்போம். உனக்கும் அரசு வழங்கி முடி சூட்டுகிறோம். பாஞ்சாலியின் மானத்தைக் காக்கக் குரல்கொடுத்த உன் தலையில் முடிசூட்டிப் பார்க்க விழைகிறது என் மனம். என் விருப்பத்தை நிறைவேற்று” என்றார் பீமன்.

விகர்ணன் நகைத்தார் ‘‘பீமா நான் அற வழியில் நிற்பவன் என்று சொன்னாயே, அது உண்மைதான் அன்று மட்டுமல்ல எப்போதும் அறத்தின் வழியில்தான் நிற்பேன். அன்று பெண்ணின் மானம் சூறையாடப்படும் நிலையில் அதன் பொருட்டு எதிர்த்துக் குரல் கொடுப்பது அறம். எனவே எதிர்த்துக் குரல் கொடுத்தேன். இன்று யார் தரப்பில் நியாயம் இருந்தாலும், நான் சார்ந்திருக்கும் என் அண்ணண் தரப்புக்காக நான் போரிடுவதே நியாயம்.

வெறும் மகுட ஆசைக்காக என் அண்ணனை விட்டு விலகி விடுவேன் என்றா நினைத்தாய்? என்னைத் தாண்டித்தான் நீ துரியோதனனை அடைய முடியும். இயலுமானால் என்னை நோக்கி உன் கதாயுதத்தைப் பிரயோகித்துப் பார். வீண்பேச்சை வீரர்கள் விரும்புவதில்லை. அவர்கள் செயல்படுபவர்கள். நீ வீரனென்றே நான் நம்புகிறேன்.”

விகர்ணனின் துடுக்கான பேச்சு பீமனுக்குக் கடும் சீற்றம் விளைவித்தது. தேரிலிருந்து குதித்துப் பாய்ந்து சென்று விகர்ணனைத் தாக்கலானான் பீமன்.

உக்கிரமான போர் நெடுநேரம் நடைபெற்றது. ஒரு மாபெரும் வீரனுடன் போர் புரிகிறோம் என்பதை பீமனின் மனம் உணர்ந்தது. அதுமட்டுமல்ல, அறத்தின் வழியே வாழ்பவர்களை வெல்வது சுலபமல்ல என்பதையும் அவன் மனம் புரிந்துகொண்டது.

மனமே இல்லாமல் தன் கதாயுதத்தால் ஓங்கி விகர்ணனை அறைந்தான் பீமன். தர்மத்தின் வழியிலேயே நின்ற அவன் முகத்தில் புன்முறுவல் படர்வதையும் சிரித்துக் கொண்டே அவன் மரணத்தை வரவேற்பதையும் பார்த்து வியந்தது பீமன் மனம். விகர்ணனின் உயிர்ப் பறவை விண்ணில் பறந்தபோது பீமன் உள்ளம் இனம் தெரியாத சோகத்தில் ஆழ்ந்தது.

மாலை சூரியாஸ்தமனத்திற்குப் பிறகு யுத்தம் நிறுத்தப்பட்டது. பாண்டவர்கள் பாசறைக்குத் திரும்பினார்கள். அனைவரிலும் நல்லவன் அன்று கொல்லப்படுவான் என்று கண்ணன் சொன்னானே? பதற்றத்தோடு காத்திருந்த பாஞ்சாலி யுதிஷ்டிரர் உள்ளிட்ட எல்லோரும் நலமாகத் திரும்பி வருவதைப் பார்த்து நிம்மதிப் பெருமூச்சு விட்டாள்.

பாஞ்சாலி கண்ணனிடம் கேட்டாள் ‘‘கண்ணா! அனைவரிலும் நல்லவன் சாவான் என்றாயே? அப்படியானால் இறந்தது யார்? என் கணவர் ஐவரிலும் மூத்தவரைத் தானே உலகம் மிக நல்லவர் எனப் புகழ்கிறது? அவரின் நலத்திற்காக நான் இன்று முழுவதும் உன்னைப் பிரார்த்தித்தவாறே காலம் கழித்தேன். கண்ணா! அவரை விடவும் நல்லவர்கள் உண்டா என்ன?”

புல்லாங்குழலைக் கையில் தட்டியவாறே நகைத்த கண்ணன் சொன்னார் “பாஞ்சாலி! நல்லவர்களிடையே நல்லவனாக இருப்பதில் என்ன சிரமம்? அப்படி இல்லாதிருப்பதுதான் கஷ்டம். ஆனால் விகர்ணன் கெட்டவர்களிடையே நல்லவனாக இருந்தான். உன் மானத்தைக் காப்பதற்காக எதிரணியில் இருந்து குரல்கொடுத்தான். இப்போது தன் அண்ணன் கெட்டவனே ஆனாலும், தன் அண்ணனுக்காக உயிரையே கொடுத்திருக்கிறான். மகுட ஆசை கூட அவன் மனத்தை மாற்ற முடியவில்லை. தான் இறப்போம் என்று தெரிந்தே இறந்திருக்கிறான். தர்மம் எந்த அணியில் இருக்கிறதோ
அந்த அணியில் தான் நான் இருப்பேன் என்பதும் நான் இருக்கும் அணிதான் வெல்லும் என்பதும் அவன் அறிந்தவைதான். ஆனாலும் தன் உயிர் போவதை அவன் ஒரு பொருட்டாய்க் கருதவில்லை. தனது அண்ணனுக்காக உயிரை விடுவதே தனது தர்மம் எனக் கருதியிருக்கிறான்.

அவன் இருந்தவரை கௌரவர்கள் அத்தனை பேரையும் அந்த நல்லவனின் தர்மசக்தி கவசமாய்க் காத்திருந்தது. அவன் இருக்கும்வரை கௌரவர்களை அழிப்பது இயலாத செயல். இன்று உன் கணவன் பீமன் அந்த நல்லவனை வதம் செய்துவிட்டான். இனி கெட்டவர்களான மற்ற கௌரவர்களை அழிப்பது கடினமல்ல. சொல் பாஞ்சாலி. சேற்றில் பூத்த செந்தாமரை போல, கெட்டவர்களிடையே நல்லவனாக வாழ்ந்தானே, இவனைவிட நல்லவர் உலகில் வேறு யார்?”

இதற்கு தர்மபுத்திரர் ‘‘ஆமாம், விகர்ணன் எல்லோரிலும் நல்லவன்! என்னை நல்லவன் என்கிறார்கள். அது உண்மையோ இல்லையோ, விகர்ணன் என்னை விடவும் நல்லவன் என்பது மட்டும் உண்மை. இந்தப் பாழும் போரால் அந்த உத்தமனையும் கொல்ல நேர்ந்ததே பீமா!” என்ற அவர் தன் விழிநீரை விரல்களால் துடைத்துக் கொண்டார்.

பீமன் இருகரம் கூப்பி வணங்கியபோது, பீமனின் கரத்திலிருந்த கதாயுதம் வெட்கத்தோடு கீழே சாய்ந்தது.

#சர்வம்_கிருஷ்ணார்ப்பனம்
——————————————–
படித்ததில் பிடித்தது. ,. வாட்ஸ் அப் பகிர்வு

திருப்பதி ஏழுமலையானுக்கு மண்சட்டியில்தான் நைவேத்யம்

பெருமாள் கோயில்களில் மிக உயர்ந்ததாக கருதப்படுவது
திருப்பதி வெங்கடாசபதி கோயில். இங்கு பீமன் என்ற குயவர்
வசித்துவந்தார். இவர் பெருமாள் பக்தர்.

ஆயுள் முழுவதும் சனிக்கிழமை விரதம் இருப்பதாக சங்கல்பம்
எடுத்துக் கொண்டவர். ஆனால், இவரது ஏழ்மையின் காரணமாக
எந்நேரமும் தொழிலில் மூழ்கிக் கிடப்பார்.

சனிக்கிழமைகளில்
கோயிலுக்கு போக நேரம் இருக்காது.

போனாலும் பூஜை முறையும் தெரியாது. தப்பித்தவறி போனால்,
பெருமாளே, நீயே எல்லாம் என்ற வார்த்தையை மட்டும் சொல்லி
விட்டு வந்து விடுவார். ஒருமுறை மனதில் ஒரு எண்ணம் உதித்தது.

பெருமாளைப் பார்க்க கோயிலுக்கு போக நேரமில்லை.
பெருமாளை இங்கேயே வரவழைத்தால் என்ன என்று யோசித்தார்.
படபடவென களிமண்ணால் ஒரு சிலையைச் செய்தார்.
பூ வாங்குமளவுக்கு அவரிடம் பணம் கிடையாது. எனவே, தான்
வேலை செய்து முடித்த மீந்து விடும் மண்ணை சிறு சிறு பூக்களாகச்
செய்து அதைக் கோர்த்து சிலையின் கழுத்தில் போட்டு வணங்கி
வந்தார்.

அவ்வூர் அரசர் தொண்டைமானும் பெருமாள் பக்தர். அவர்,
சனிக்கிழமைகளில் தங்கப்பூ மாலை ஒன்றை அணிவிப்பார்.

ஒருமுறை இப்படி அணிந்து விட்டு, மறுவாரம் வந்தார்.
பெருமாளின் கழுத்தில் மண் பூ மாலை தொங்கியது. பட்டர்கள்
தான் ஏதாவது தவறு செய்கிறார்களோ என குழப்பத்தில் சென்றார்.

அன்று கனவில் தோன்றிய பெருமாள், நடந்ததைச் சொன்னார்.
அந்த குயவரின் இல்லத்திற்கு நேரில் சென்ற அரசர், அவருக்கு
வேண்டிய அளவு பொருளுதவி செய்தார். அப்பொருளைக்
கண்டும் மயங்காமல், பெருமாள் பணியே செய்து வந்த குயவர்
இறுதிக்காலத்தில் வைகுண்டத்தை அடைந்தார்.

பெருமாளின் ஆணைப்படி, அந்த பக்தரைக் கவுரவிக்கும் வகையில்
இப்போதும், திருப்பதி ஏழுமலையானுக்கு மண்சட்டியில்தான்
நைவேத்யம் செய்யப்படுகிறது.


———————————-

« Older entries