மன்னரும், சந்தன வியாபாரியும்!

மதுராபுரி நாட்டை, மன்னர் போஜராஜன் ஆண்டு வந்தார்.
அவர் நீதி தவறாதவர். குடிமக்கள் நலனைப் பற்றியே,
இரவு, பகலும் சிந்திப்பார். நலத்திட்டங்களை வகுத்து
மக்கள் சுபிட்சமாய் வாழச்செய்தார்.

வாரம் ஒருமுறை, நாட்டை வலம் வருவார். மக்களிடம்
குறைகளைக்கேட்டு, தீர்த்து வைப்பார். அப்போது,
பார்ப்பவர்களை எல்லாம் நலமுடன் வாழ வேண்டும் என,
மனதில் வேண்டிக்கொள்வார்.

கடைவீதியில், ஒரு சந்தன வியாபாரியை பார்க்கும் போது
மட்டும் மனதில் வெறுப்பு ஏற்படும். அவனை,
‘கொல்ல வேண்டும்’ என்ற எண்ணம் வரும்.

ஒருநாள் –
நாட்டுவலம் முடிந்து திரும்பியதும் மந்திரி மதிவாணரிடம்,
‘ஒவ்வொரு குடிமகனையும் பார்க்கும் போது, வாழ்த்த
எண்ணுகிறேன். ஆனால், சந்தன வியாபாரியை மட்டும்
கொல்லத் தோன்றுகிறது…’என்றார்.

உரிய காரணத்தை அறிந்து சொல்வதாக, உறுதி
சொன்னார் மந்திரி.

மறுநாள், மாறு வேடத்தில் சந்தன வியாபாரி கடைக்குச்
சென்றார், மந்திரி. ஒரு சந்தனக்கட்டையை விலை பேசி
வாங்கினார். பின், ‘வியாபாரம் நன்கு நடக்கிறதா…
போதுமான லாபம் கிடைக்கிறதா…’ என, விசாரித்தார்.

‘சந்தனக்கட்டை விலை அதிகம் என்பதால், வியாபாரம்
அவ்வளவாக இல்லை. வருமானம் மிக குறைவு. மன்னரின்
தந்தை இறந்த போது, ஒருக்கட்டு சந்தனக்கட்டை வாங்கினர்.

ஆயிரம் பொற்காசுகள் கிடைத்தன. இனி, மன்னர்
இறந்தால் தான், நிறைய பொற்காசுகள் கிடைக்கும்…’
என்று, பெருமூச்சு விட்டான், வியாபாரி.

அவன் எண்ணத்தை புரிந்து அரண்மனைக்கு திரும்பினார்
மந்திரி.

மறுநாள், மந்திரியாக, சந்தன வியாபாரியை சந்தித்தார்
மந்திரி. அவனுக்கு, ஆயிரம் பொற்காசுகள் கொடுத்து,
‘மன்னர் உனக்கு வழங்கியுள்ள பரிசு…’ என, கூறினார்.

மிகவும் மகிழ்ச்சியுடன் பெற்றுக்கொண்ட வியாபாரி,
‘மன்னர், நுாறாண்டுகள் நலமுடன் வாழ வேண்டும்…’ என,
வாழ்த்தினான்.

அடுத்த வாரம் –
மன்னர், நாட்டுவலம் சென்றார். சந்தன வியாபாரியைக்
கண்டார். அவனைக் கொல்லத் தோன்றவில்லை. மாறாக,
வாழ்த்த தோன்றியது.

அரண்மனை திரும்பிய மன்னர், மந்திரியை சந்தித்தார்.
வியாபாரி மீதிருந்த எண்ணம் மாறியுள்ளதை சொன்னார்.
மகிழ்ச்சியடைந்த மந்திரி, வியாபாரியை சந்தித்து,
பொற்காசுகள் கொடுத்த விவரத்தை தெரிவித்தார்.

மன்னர் போஜராஜன், அந்த அனுபவத்தை, மக்கள் மனதை
புரியும் பாடமாக, கற்றுக் கொண்டார்.

குட்டீஸ்… எண்ணங்களுக்கு எவ்வளவு சக்தி இருக்கு
பாத்தீங்களா… மனதை நற்சிந்தனைகளால் நிரப்பி,

துாய்மையாக வைத்துக் கொள்ளுங்கள்!


  • ஜி.தர்ஷிணி
    சிறுவர் மலர்
Advertisements

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out /  மாற்று )

Google photo

You are commenting using your Google account. Log Out /  மாற்று )

Twitter picture

You are commenting using your Twitter account. Log Out /  மாற்று )

Facebook photo

You are commenting using your Facebook account. Log Out /  மாற்று )

Connecting to %s

%d bloggers like this: