வித்தைக்காரன்!

E_1499311063.jpg

முகலாய மன்னர் அக்பரின் அரசவைக்கு, வித்தைக்காரன்
ஒருவன் வந்தான்.

”அரசே! நான் ஒரு வித்தைக்காரன். எனக்கு தெரிந்த
வித்தைகளை தங்கள் முன் செய்து காட்ட விரும்புகிறேன்,”
என்றான்.

”என்ன மாதிரியான வித்தைகள் செய்வாய்… மந்திர, தந்திர
வித்தைகள் தெரியுமா…” என்று வித்தைக்காரனிடம் கேட்டார்
அக்பர்.

”அரசே, எனக்கு மந்திரமும் தெரியாது; மாயமும் தெரியாது.
பறவைகளை போலவும், மிருகங்களை போலவும் நடித்து
காட்டுவேன்,” என்றான் வித்தைக்காரன்.

”சரி, நாளை மாலையில், அரண்மனை பூங்காவை ஒட்டியுள்ள
மண்டபத்தில், உன்னுடைய வித்தைகளை செய்து காட்டு…”
என்றார் அக்பர்.

மறுநாள்

அரண்மனை பூங்காவை ஒட்டியுள்ள திறந்தவெளி மண்டபத்தில்,
தனக்கு தெரிந்த வித்தைகளை செய்து காட்டினான் வித்தைக்காரன்.

முதலில், சேவலை போல கூவினான். உண்மை சேவல் எப்படி
கூவுமோ அதை போலவே செய்து காட்டினான். வித்தையை காண
வந்தவர்கள் கைதட்டி ஆரவாரம் செய்தனர்.

அதன் பின், பூனையை போல கத்தினான்; நாயை போல
குரைத்தான். ஒரு நாய், மற்றொரு நாயை கண்டதும் எவ்வாறு
குரைக்குமோ, அதை போல் குரைத்து காட்டினான்.

அனைவரும் வித்தைக்காரனின் திறமையை கண்டு, வியப்படைந்து,
மகிழ்ச்சி பெருக்கால், கைதட்டி ஆரவாரம் செய்தனர். பீர்பல்
மட்டும் பேசாமல் பார்த்து கொண்டிருந்தார்.

முடிவில் வித்தைக்காரன், காளை மாடு போல் நடிக்க ஆரம்பித்தான்.
அசல் காளை மாடு எவ்விதம் நடக்குமோ அவ்விதமே நடந்து
காட்டினான்.

அச்சமயம், சிறு கல்லை எடுத்து வித்தைக்காரனின் முதுகில்
எறிந்தார் பீர்பல்.

இதை பார்த்த அக்பர், ”சுத்தப் பைத்தியக்காரனாக இருக்கிறாயே…
எவ்வளவு அருமையான வித்தைகளை செய்கிறான். அதை
ரசிக்காமல், ‘உம்’ மென்று உட்கார்ந்திருந்தாய்… இப்போது,
வித்தைக்காரன் முதுகில் கல்லை எறிகிறாய். இது என்ன
பைத்தியக்காரத்தனம்…” என்று கடிந்தார்.

”அரசே, வித்தைக்காரன் செய்த வித்தைகளை நானும் பார்த்தேன்.
அவை ஒன்றும் என் மனதுக்கு பிடிக்கவில்லை. எல்லா
வித்தைக்காரர்களும் செய்து காட்டுகிற வித்தைகளை தான்,
இவனும் செய்கிறான் என்று நினைத்தேன்.

ஆனால், அவன் முதுகில் கல்லை விட்டெறிந்தபோது, அவன் ஒரு
வித்தையை செய்தான். நீங்கள் ஒருவரும் அதை கவனிக்கவில்லை;
நான் கவனித்தேன். உண்மையிலேயே இவன் ஒரு சிறந்த
வித்தைக்காரன் தான்,” என்றார் பீர்பல்.

”அப்படியா! நீ அவன் முதுகில் கல்லை விட்டெறிந்ததும், வித்தை
செய்து காட்டினானா… அது என்ன…” என்று ஆவலுடன் கேட்டார்
அக்பர்.

”அரசே, காளை மாடு போல் நடந்ததை நீங்கள் பார்த்து ரசித்தீர்கள்.
ஓடியாடி, தலையால் முட்டுவதை போல் நடித்த போது, நீங்கள்
கைதட்டி மகிழ்ந்தீர்கள். அவ்வாறு வித்தைகள் செய்யும் போது,
அவன் முதுகில் சிறு கல்லை விட்டெறிந்தேன்.

”அப்போது, கல்பட்ட இடத்தை மட்டும் சுழித்துக் காட்டினான்.
மாடுகளின் மேல் கல்லை விட்டெறிந்தால், அவை, கல்பட்ட
இடத்தை மட்டும் சுழித்து காட்டும். அதை போல, செய்து காட்டிய
இந்த வித்தைக்காரன் உண்மையிலேயே மிக சிறந்த
வித்தைக்காரன் தான்,” என்றார் பீர்பல்.

பீர்பல் சொல்வதை அறிவதற்காக, ஒரு சிறு கல்லை எடுத்து
வித்தைக்காரன் முதுகில் எறிந்தார் அக்பர். முதுகில் கல் பட்டதும்,
மாடு போல் நடித்து கொண்டிருந்த வித்தைக்காரன், கல்பட்ட
இடத்தை மட்டும் சுழித்து காட்டினான்.

வித்தைக்காரனின் திறமையை கண்ட அக்பர், நிறைய பரிசுகள்
அளித்து மகிழ்ந்தார். அதே சமயத்தில், வித்தைக்காரன்
திறமையை பரிசோதித்து பார்த்த பீர்பலுக்கும், பரிசுகள்
கொடுத்து பாராட்டினார்.

——————————-

சிறுவர் மலர்

 

Advertisements

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s

%d bloggers like this: